Мирнэй, Ленскэй, Алдан, Өлүөхүмэ, Покровскай уонна Ньурба куораттара тупсарыныыга уонна уопсастыбаннай миэстэлэри сайыннарыыга бырайыактарынан Россия таһымнаах куонкуруска кытталлар. Ол туһунан Саха сиринээҕи туһааннаах хамыыһыйа быһаарда, суруйар СИА.
Россия таһымнаах куонкурсугар кыттыыга барыта алта сайаапка киирдэ. Иккис бөлөххө (20 — 50 тыһ киһилээх нэһилиэнньэлээх) — Мирнэй, Ленскэй, Алдан. Оттон үһүс бөлөххө (20 тыһ киһиэхэ диэри нэһилиэнньэлээх) — Өлүөхүмэ, Покровскай, Ньурба.
Мииринэйдээҕи култуурунай-аралдьытар паарка сүрүн сиринэн култуурунай киин буолуоҕа. Манна кафелаах коворкинг, IT-киин, таһырдьа толорор музыканнарга аналлаах сыана, дьаарбаҥкаларга уонна быыстапкаларга аһаҕас миэстэ. Мантан араас тиэмэлээх хаамыы маршруттара үлэлиэхтэрэ.
Ленскэй Ойуунускай уулуссатын биир кэлим сайыннарыыга, тупсарыыга «Путь к реке» диэн бырайыагынан кыттар. Манна мини-сквердэр, навестар, быыстапкалар, оҕо уонна рекреационнай түһүлгэлэр үлэлиэхтэрэ. Бэлэсипиэттиир сир, тротуар сынньалаҥ миэстэлэрин ситимниэхтэрэ.
Алдан Орто Салаа өрүс кытылын тупсарыыга «Парк Золотой» бырайыагы киллэрэр. 2020 сылга куонкуруска кыттан, бастыҥынан ааҕыллыбыта. Онон тутуутун бастакы түһүмэҕэ ыытыллыбыта. Оҕо оонньуур былаһаакката, эти-сиини дьарыктаныыга миэстэлэр, дьаарбайар сирдэр уо.д.а. баар буолаллар. Сүрүн болҕомтону арт-эбийиэк «Драга №1» ылар, күөл орттугар тутулунна.
Өлүөхүмэҕэ Мариинскай сквери оҥорору этэллэр. Куорат ортотугар баар. Сквери тупсарыы сынньалаҥы араас социокултуурунай бырагырааманан ситэрэн-хоторон биэрии көрүллэр. Манна маастар-кылаастар, лекциялар уонна сибиэһэй салгыҥҥа тэрээһиннэр ыытыллыахтара. Ортотугар оҕо былаһаакката, воркаут, скейт-былаһаакка уонна саахымакка оонньооһун киллэриллибиттэр.
Ньурба бырайыага Бүлүү эбэ кэрэ көстүүтүгэр дьэндэйиэхтээх. Саха култуурата уратытык бэриллиэхтээх. Сэттэ хайысха саха култууратын тыыныгар көрдөрүллэр: чуумпу кытыл, спорт, дьаарбайар түһүлгэ, айар кут былаһаакката, барбекю, тулалыыр эйгэни үөһэттэн көрүү уонна ыытыллар тэрээһиннэри түмүү.
