Саха сиригэр ыһыы үлэтэ түмүктэнэн эрэр, билигин сүөһү аһын бэлэмнээһиҥҥэ ылсыахтара. СИА өрөспүүбүлүкэ пресс-сулууспатыгар сигэнэн суруйар.
Оту бэлэмнээһинтэн — кыстык биллэр. Саха сиригэр быйыл 471 495 тн от, 16 112 тн сенаж уонна 25 567 тн сиилэс бэлэмнэниэхтээх. Хаһаайыстыбаларга уонна муниципальнай оройуоттарга сайыҥҥы үлэни болдьоҕор толорор сорук турар: мелиоративнай үлэлэр, аһыҥаны кытта охсуһуу, тыа хаһаайыстыбатын техникатын өрөмүөннээһин, массыына уматыгынан хааччыйыы, ходуһаларга киирэр-тахсар суоллары, муосталары өрөмүөннээһин.
Тыа хаһаайыстыбатын миниистирин солбуйааччыта Николай Афанасьев иһитиннэрбитинэн, үлэни сүрүнүүр суһал штаб тэриллибит.
«Ходуһалары барытын туһаҕа туруорар сорук турар, муниципалитиеттарга от саппааһын хааччыйыыны эмиэ учуоттуохтаахпыт. Хас улуус аайы штабтар тэрилиннилэр. От ыйын 1 күнүгэр диэри аграрийдарга былаан тиксиэҕэ» — диэтэ кини.
Биэдэмистибэҕэ этиллибитинэн, от ыйыгар 37 тыһ киһи, 10 тыһ кэридҥэ звено уонна 12 тыһ тахса техника окко турунуоҕа. От ыйын ортотуттан оттооһуҥҥа маассабай тахсыы буолуоҕа.
«Туймаада-Нефть» тэрилтэ балаҕан ыйын 1 күнүгэр диэри болдьохтоон, уһатыллыбыт төлөбүргэ уматыгы тириэрдэр.
