Мэҥэ-Хаҥалас улууһун Хаптаҕайдааҕы бурдук оҥорор собуотугар итиэннэ Амур уобалаһыгар уотурба оҥоруутун сөргүтүөхтэрэ. Сүөһү булкаас аһылыгын бурдугун Забайкальскай кыраайтан ылыахтара. Бу туһунан СӨ бырабыыталыстыба бэрэссэдээтэлэ Андрей Тарасенко бэйэтин инстаграм сирэйигэр суруйар.
«Хаптаҕайдааҕы бурдук оҥорор собуотугар итиэннэ Амур уобалаһыгар сүөһү булкаас аһын оҥорору сөргүтүөхпүт. Дьиэ кыылларыгар, көтөрдөргө анаммыт уотурбаны өрөспүүбүлүкэ тыа хаһаайыстыбатын тэрилтэлэригэр, кэтэх хаһаайыстыбаларга батарыахпыт», — диэбит Андрей Тарасенко.
Уһук Илиҥҥи уокурук Сэбиэтигэр Андрей Тарасенко Забайкальскай кыраай губернатора Александр Осиповтыын хаачыстыбалаах бурдугунан сөбүгэр сыанаҕа хааччыйары кэпсэппит.
«Амур уобалаһыгар баар собуоппутугар бурдугу Забайкальскай кыраайтан аҕалары кэпсэттибит. Забайкальеҕа бурдук дэлэгэйдик үүнэр. Амур уобалаһыгар бородууксуйа бэйэҕэ турар сыаната удамыр, федеральнай былааһы кытары тырааныспар ороскуотун уйунарга субсидия туруорсуохпут, ол иһигэр Аартыка улуустарыгар тиэрдэри эмиэ», — диэн суруйбут премьер.
Билиҥҥитэ уотурбаны миэстэтигэр тиэрдии бэйэҕэ турар сыанатын куоһарар, ол иһин көрүллэр субсидия сүөһү аһын тиэрдээччилэргэ барар. Ити кыһалҕаны туоратар сыалтан «бэйэ оҥорон таһаарыытын сөргүтүөхпүт», диэбит Андрей Тарасенко.
