Быйыл Табаһыт күнэ Саха сиригэр бастакытын бэлиэтэннэ. Региоҥҥа барыта 106 хаһаайыстыба баар, онно 1,2 тыһ киһи үлэлиир. Салалта 2021 сылга бу салааҕа 800 мөл солк тыырыаҕа. Бу 5%-нан ааспыт сыллааҕар элбэх. Тыа хаһаайыстыбатын министиэристибэтэ иһитиннэрдэ.
2020 сыл атырдьах ыйыгар Ил Дархан Айсен Николаев Саха сиригэр Табаһыт күнүн бэлиэтиир туһунан ыйаахха илии баттаабыта. Бырааһынньык кулун тутар бастакы субуотатыгар сылын аайы бэлиэтэнэр.
«Олохтоох таба иитиитиигэр сылын аайы өрөспүүбүлүкэ бюджетыттан субвенция көрүллэр. Методика быһыытынан, сыл саҕаланыытыгар баар таба ахсаанынан көрүллэн, муниципалитетарга тыырыллар. Сыл устата, статистика дааннайынан көннөрүллэн биэрэр. 2020 сылга 756 мөл көрүллүбүт буоллаҕына, 2021 сылга — 800 мөл солк, манна таба ахсаана эбиллибитэ учуоттанна», — министиэристибэҕэ эттилэр.
Үбүлээһин анал методиканан көрүллэр. Ыстаадалар түһүүлэнэр сирдэринэн туундара, тыа-туундара, хайа-тыа, тыа диэн арахсар. Тохсуньу 1 күнүнээҕи көрдөрүүнэн, 157,5 тыһ таба баара биллэр. «Төбө ахсаана 3,6% улаатта. Былаан туолуута хаһаайыстыбаларга 101,8%», — чуолкайдаан биэрдилэр.
