Чурапчы улууһун киинигэр “Бастыҥ көрүүлээх-истиилээх дьиэ” федеральнай бэлиэни туттарыы сиэрэ-туома ыытылынна. Тэрээһиҥҥэ Саха сирин баһылыга Егор Борисов, “ОДьКХ уларыта тутууга көмөлөһөр фонда” госкорпорация кэтээн көрөр сэбиэтин бэрэссэдээтэлэ Сергей Степашин уонна фонда генеральнай дииэктэрэ Константин Цицин кытыннылар.


Чурапчыга Ленин уулуссатыгар турар 24 кыбартыыралаах дьиэ өрөспүүбүлүкэҕэ төрдүс уонна Уһук Илиҥҥэ уон сэттис бастыҥ дьиэлэр ахсааннарыгар киирдэ. Бу дьиэ 2015 с. дьону саахалланар туруктаах дьиэлэртэн көһөрүү бырагырааматынан киирбитэ.

“Саха сирин тыатын сиригэр дьон олоҕун тупсарар үлэ салгыы ыытыллар. ОДьКХ уларыта тутууга көмөлөһөр фонда көмөтүнэн ити ситиһиллэр”, — диэн бэлиэтээтэ Ил Дархан Егор Борисов.

Ил Дархан соторутааҕыта диэри бу миэстэҕэ саахалланар туруктаах дьиэлэр турбуттара, оттон билигин бастакы этээһигэр оҕо саадтаах кыраһыабай дьиэ тутуллубутун бэлиэтээтэ.

Саҥа дьиэни тутар эрэ тутах, саҥа дьиэни көрүү-истии дьоһун суолталаах. Бу эһиги дьиэҕит, бу эһиги кыбартыыраҕыт. Биһиги бүгүн дойдубутугар аан бастаан “Дом образцового содержания” бэлиэни туттарабыт”, — диэтэ Сергей Степашин.

Санатан эттэххэ, бу бэлиэ Россия тутууга уонна дьиэ-уот коммунальнай хаһаайыстыбатыгар министиэристибэтин ОДьКХ эйгэтигэр уопсастыбаннай хонтуруол национальнай киинин уонна ОДьКХ уларыта тутууга көмөлөһөр фонда көҕүлээһиннэринэн олохтоммута. “Дом образцового содержания” дьиэ тас өттүгэр ыйанар табличка уонна “ОДьКХ хаачыстыбатын бэлиэтэ” “Хатан” ХЭТ элбэх кыбартыыралаах дьиэни салайар хампаанньа дириэктэригэр Владимир Сивцевкэ туттарылынна.

0
0
comments powered by HyperComments