Бэс ыйын 1 күнэ. Самаан сайын салалынна. От-мас көҕөрдө. Көтөр-сүүрэр, ынах-сүөһү этэҥҥэ күөххэ үктэннэ. Сайылыкка хаһаайыстыбалар көстүлэр. Бааһыналарга хортуоппуй олордо. Үөрэх дьыла түмүктэннэ, оҕо-аймах үөрдэ-көттө.
Бэс ыйа — саха халандаарыгар:
Бэс ыйын 3 күнэ
Саар Көстөкүүн күнэ. Анды кэлэр. Сайылыкка көһөллөр. Собо ыыр.
Бэс ыйын 5 күнэ
Саар Көстөкүүн. Анды, ээбиллэ кэлэр. Бу күн ардахтаах буоллаҕына — күһүнэ ардахтаах.
Бэс ыйын 7 күнэ
Мүөттээх сиик түһэр. Сүмэһин таһаарар үүнээйи аһылыктаах үөн-көйүүр тиллэр, ыам кумаара түһэр.
Бэс ыйын 10 күнэ
Дьахтар күүлэйдиир күнэ. Сайылыкка көһүү сүпсүлгэнэ бүтэн, нус-хас үүт тураан күннэр үүнэллэр. Уоскуйбучча дьахталлар оҕолорун батыһыннара сылдьан, кырдьаҕас хатыҥ маска салама ыйыыллар, алаадьы буһаран сыт таһаараллар. Өгүрүө кэлэр. Дөлүһүөн сибэккилэнэр, сардаана тыллар. Бу күн чуумпу — үчүгэй үүнүүлээх дьыл.
Бэс ыйын 12 күнэ
Российскай федерация суверенитетын күнэ. Ыраас, куйаас, чэмэлкэй күннэр.
Бэс ыйын 14 күнэ
Самаан сайын саҕаланар кэмэ. Ыhыахтар саҕаланаллар. Ардаатаҕына — үчүгэй үүнүү.
