Саха сиригэр сүрэҕи көһөрүү эпэрээссийэтэ аан бастаан оҥоһулунна 

0
11

От ыйын 6 күнүгэр Саха сирин уонна Уһук Илиҥҥи федеральнай уокурук историятыгар хаһан да буолбатах түгэн буолла. Ол эбэтэр Саха сиригэр сүрэҕи, быары уонна икки киһиэхэ бүөрү көһөрүү эпэрээссийэлэрэ  биир кэмҥэ оҥоһулуннулар.


Сүрэҕи көһөрүү эпэрээссийэтин Медицина национальнай киинин—Өрөспүүбүлүкэтээҕи 1 №-дээх балыыһа уонна Өрөспүүбүлүкэтээҕи 2 №-дээх балыыһа быраастара кардиохирург Петр Захаров тус салалтатынан аан бастаан оҥордулар.

Биһиги быраастарбыт туга-ханныга биллэ илигинэ улаханнык кэпсээбэт, «тыаһы-ууһу таһаарбат» идэлээхтэр. Ол да сиэринэн,  эпэрээссийэ оҥоһуллубутун эрэ кэннэ санааларын үллэһиннилэр.

Александр Петров, Өрөспүүбүлүкэтээҕи 2 №-дээх балыыһа кылаабынай бырааһын солбуйааччы:

— Уорганы кадавернай көһөрүү (трансплантация) бастакы түһүмэҕэ биһиги балыыһабытыгар оҥоһуллар. Биһиги балыыһабыт уорганы көһөрүүнү күүтэр эмтэнээччилэр донорскай базаларынан буолар. Мэйиилэрэ өлбүт дьон (быраастар консилиумнара быһаарар) донордарынан буолаллар. Медицина национальнай киинин трансплантолог-быраастара Өрөспүүбүлүкэтээҕи 2 №-дээх балыыһа эпэрээссийэлиир саалатыгар кэлэллэр, манна донортан уорганы ылыы эпэрээссийэтэ оҥоһуллар. Киһиттэн ылыллыбыт уорганнар (быар, бүөр, сүрэх) Медицина национальнай киинигэр илдьиллэллэр. Дьэ, манна эмтээнээччи  наадыйар уорганын көһөрүү эпэрээссийэтэ саҕаланар.

Альберт ВАСИЛЬЕВ, СӨ Доруобуйа харыстабылын министиэристибэтин штаты таһынан кылаабынай трансплантолога, Медицина национальнай киинин клинико-диагностическай киинин дириэктэрэ:

– Бүгүн историяҕа суруллар күн үүннэ. Биир донортан түөрт киһиэхэ кадавернай уорганнары көһөрдүбүт. Ол иһигэр, сүрэҕи көһөрүүгэ өр кэм устата бэлэмнэммиппит. Онно саамай уустуга – тэрээһин боппуруостар.

Биһиэхэ сүрэҕи көһөрүүгэ наадыйар 6 киһи баар. Ол гынан баран, кинилэр бары доруобуйалара эппиэттиир буолбатахтар, үгүстэригэр сүрэх көһөрүллүүтэ көҥүллэммэт. Сүрэх көһөрүүтүгэр донор уонна реципиент хааннара уонна уорганнарын кээмэйэ сөп түбэһэллэрэ улахан суолталаах. Онон, кинилэр иккиэн уһуннара уонна ыйааһыннара тэҥ соҕус буолуохтаахтар. Саастарын туһунан этэр буоллахха, 50-гар диэри саастаах киһи — донор, уорганы ылар киһи 60-гар диэри саастаах буолуохтаах. 45 саастаах киһи сүрэҕин 30 саастаах ыарыһахха олордуохха сөп.

Сүрэҕи көһөрүү эпэрээссийэтигэр отуттан тахса үрдүк квалификациялаах исписэлиис: кардиохирурдар, анестезиолог-реаниматологтар, медицинскай сиэстэрэлэр кытыннылар.

Саҥа сүрэхтэммит киһи доруобуйата тупсар. Кини эпэрээссийэ кэнниттэн балыыһаттан 30 хонугунан тахсыан сөп. Ол кэнниттэн кини кэлэр сыллар усталарыгар уорганы өйүүр анал терапияны ылар.

Николай ЛУГИНОВ, Медицина национальнай киинин генеральнай дириэктэрэ:

– Сүрэҕи көһөрүү эпэрээссийэтигэр быраастары балтараа сыл бэлэмнээбиппит. Үтүмэн үлэ ыытылынна: трансплантологияҕа үлэлиир каадырдар бары СӨ Доруобуйа харыстабылын министиэристибэтин өйөбүлүнэн академик В.И.Шумаковаатынан трансплантология уонна искусственнай уорганнар национальнай медицинскэй чинчийэр кииннэригэр үөрэммиттэрэ. Эпэрээссийэлэри оҥорорго ороскуоттуур матырыйааллары уонна инструменнары атыыласпыппыт, сүүһүнэн ахсааннаах тэрээһин боппуруостарын быһаарбыппыт.

Үрдүк таһымнаах быраастар уонна министиэристибэ өйөбүлүнэн Саха сирин медицинатыгар сүҥкэн хардыыны оҥордубут. Сүрэх эпэрээссийэтин оҥорууга кыттыбыт хас биирдии бырааска, медицинскэй сиэстэрэлэргэ, алын сүһүөх медицинскэй үлэһиттэргэ, техническэй үлэһиттэргэ, отделениелар салайааччыларыгар уонна дириэктэрдэригэр ис сүрэхпиттэн махтанабын. Биһиги улахан хамаандабыт туруоруммут сорукпутун толордубут уонна иннибит диэки эрэллээхтик көрөбүт.

Борис АНДРЕЕВ, Өрөспүүбүлүкэтээҕи 2 №-дээх балыыһа кылаабынай бырааһа:

– Бүгүн өр күүппүт күммүт үүннэ. Сүрэҕи көһөрүү ситиһиилээхтик ааста. Түөрт ыарыһахха саҥа уорганнары көһөрдүбүт. Саха сирин доруобуйатын харыстабыла сайдыы саҥа кэрдииһигэр таҕыста. Барыгытыгар ситиһиилэри баҕарабын!

Надежда ЕГОРОВА, 10

0
0