Саха сиригэр дьиэ табатын иитиигэ, ууһатыыга, туһаҕа таһаарыыга олохсуйбут үгэһи тутуһуу тохтуон сөп. Айсен Николаев сыһыаннаах министиэристибэлэргэ бу хайысханы киэҥник көрөн, промышленнай таһымҥа таһаарыы кэмэ кэлбитин бэлиэтээтэ. Маннык этиини Арктика кытылын уонна хотугу улуустар олохтоохторо Ил Дарханы кытта көрсүһүүгэ оҥордулар.


Табаны иитиигэ уонна туһаныыга табыгастаах ньымалар тустарынан этиини Айсен Николаевка Эдьигээн уонна Өлөөн биэнсийэлээхтэрэ оҥордулар. Кинилэр этэллэринэн, табаны иитиигэ олохсуйбут үгэһи тутуһуу тыа хаһаайыстыбатын атын эйгэтин кытта тэҥҥэ хардыылыыр, холобур сүөһү иитиититтэн, хаалан хаалыан сөп.

Дьиэ табата, атын дьиэ кыылларын курдук, көрүүгэ-истиигэ наадыйар. Көрүү-истии суох буоллаҕына, холобур, төрүөх кэмигэр 60%-ҥа тиийэ тугуту сүтэриэххэ сөп. Хотугу дьон этэллэринэн, табаны коммерческай сыалга иитиигэ ыстаадаҕа 200 төбөттөн элбиэ суоҕун наада. Маны сэргэ, ырыынакка олус сыаналанар таба хаанын, иһин-үөһүн туһаныыны эмиэ киэҥ эйгэҕэ муҥутуур кыаҕынан таһаарар барыстаах буолуоҕа.

«Биллэн турар, үгэһи хаалларыахха наада, ити эрээри таба да хаһаайыныгар дохуоту биэриэн сөп. Ол иһин билигин хаһаайынныы сыһыаҥҥа аныгылыы салайыныыны киллэриэххэ наада», — диэтэ Айсен Николаев табаһыттар этиилэрин истэн баран.

Саха сирин баһылыга Арктика уонна Тыа хаһаайыстыбатын министиэристибэлэригэр бу боппуроуһу үөрэтэн баран пилотнай бырайыагы саҕалыыры эттэ: «Хотугу сир дьонун туһугар бырайыагы толкуйдаан, оҥорон, үлэлэтиэххэ. Дьыала олохтоохтор туһаларыгар хамсаан бардаҕына, атын оройуоннарга тарҕатан кэҥэтэн биэриэхпит«, — диэтэ.

Ил Дарханы кытта тус кэпсэтии «Биир ньыгыл Россия» баартыйа бэрэссэдээтэлэ Дмитрий Медведев регионнааҕы приемнайыгар буолла.

0
0
comments powered by HyperComments