Өрөспүүбүлүкэҕэ 15 муниципальнай тэриллиигэ 30 ойуур баһаарын умуруорууга үлэ барар, уопсай иэнэ 201 гектар. Бу туһунан СИА-ҕа экология министиэристибэтин пресс-сулууспата иһитиннэрэр.
Бүгүҥҥү күҥҥэ биэс уоту тохтоттулар. Ааспыт сууккаҕа сэттэ ойуур баһаара умуруорулунна. 788 киһи, 67 техника үлэлээтэ. Суола-ииһэ суох сирдэргэ уонна ырааҕынан тайаан сытар ойуур пуондатыгар 189 термоточка баара биллэр, уопсай иэнэ 1 387 597 га. Ыксалаах балаһыанньа хамыыһыйатынан маннык баһаардары умуруоруу тохтотуллан турар.
Баһаар сезона саҕаланыаҕыттан ойуур пуондатыгар барыта 535 уот турда, уопсай иэнэ 1 644 812 га, ол иһигэр толору хонтуруолга тутуллар сиргэ — 131, уопсай иэнэ 7 778 га.
СӨ бырабыыталыстыбата «Рослесхозка» көрдөһүүтүнэн федеральнайдааҕы «Авиалесоохрана» тэрилтэ парашютист-десантниктар күүстэрэ көмөлөһөр. Бүгүн 90 парашютист-десантник Ханты-Мансийскай автономнай уокуруктан уонна Тюмень уобалаһыттан үлэлииллэр. Бу нэдиэлэҕэ 95 баһаарынай Амур уонна Чита уобаластарыттан кэлэллэрэ күүтүллэр.