Ыҥырыа мүөтүн хомуйааччылар алтынньы 8 күнүгэр «Чочур Мырааҥҥа» быйылгы мүөт фестивалыгар кытыннылар.
Саха сиригэр маннык дьарыктаах дьон бэйэлэрин бородууксуйаларын атыыга таһаардылар.
«Кэлин элбэх бассыабай мүөт атыыланар. Ол иһин, олохтоох мүөт хайдаҕын көрдөрөр туһуттан маннык тэрээһин ыытыллар. Бу минньигэс аһылыгы атыылааһын элбии-эбиллэ турар, бэл, рестораннарга кытта баар буолла», — диир «Чочур Мыраан» генеральнай дириэктэрэ Герман Арбугаев.
Фестивалга Татарстан институтун профессора Валентин Шилов жюрины салайда.
«Сыл устата мин дьону ыҥырыа мүөтүн хомуйарга үөрэттим. Казань куораттан бэс ыйыгар ыҥырыа 100 дьиэ кэргэнин аҕалбыппыт. Билигин Саха сиригэр үрдүк хаачыстыбалаах мүөт оҥоһуллар буолла диэн бигэтик этиэххэ сөп», — диир профессор.
Шилов мүөт биир технологиянан оҥоһуллубутун да үрдүнэн хас биирдии хаһаайыстыба киэнэ амтана араас буоларын ойуччу тутан этэр. «Ити хас биирдии ыҥырыа уратыта учуоттанарыттан тутулуктаах» — диир кини.
ДьТХА эбии үөрэхтээһиҥҥэ институт дириэктэрэ Александра Павлова саха мүөтүн географиятын туһунан кэпсээтэ. «Манна Жатай, Пригород бөһүөлэктэрин, Таатта, Мэҥэ Хаҥалас улуустарын уонна Дьокуускай мүөтү оҥорооччулара муһуннулар. Өктөм агрооскуолатыгар, Бүлүүгэ уонна Намҥа олус минньигэс мүөтү оҥороллор», — диэтэ кини.
РФ тыатын хаһаайыстыбатын миниистирэ Александр Ткачев 2017 сылга бааһынай, фермерскэй хаһаайыстыбалар, кэтэх дьон ыҥырыа мүөтүн оҥорууларын судаарыстыба өйүүр туһунан этиитэ бу үлэ салгыы тэриллэригэр сүрүн төһүү буолбут.
Профессор Валентин Шилов ДьТХА ыытар үөрэҕэ алтынньы 14 күнүгэр диэри уһуур.
