Саха сиригэр канализацията суох 32 оскуола хаалла

Дойду бырабааталыстыбатын бэрэссэдээтэлэ Дмитрий Медведев бэҕэһээ, кэлэр үөрэх дьылыгар бэлэмнэниинэн сибээстээн, эрэгийиэннэри кытта селекторынан мунньах ыытта.


Онно тыын суолталаах боппуруостартан биирдэстэринэн оскуолалары киин ититэр ситимҥэ холбооһун уонна канализациялаах тахсан киирэр сирдэринэн хааччыйыы буолла.

«Билигин даҕаны уута, киин ититэр ситимэ, канализацията, сылаас тахсан киирэр сирэ суох оскуолалар бааллар. Мин хас сыл ахсын губернатордар болҕомтолорун ууралларыгар этэбин. Билэбин, үлэ барар, ол эрээри, бытаан тэтимнээхтик”, — диэн Дмитрий Медведев мунньах кэмигэр эттэ.

РФ Үөрэҕин миниистирэ Ольга Васильева итинник кыһалҕалаах 1036 оскуолалаах 11 эрэгийиэни ааттаталаата. Ол курдук, Забайкальскай кыраайга 293, Дагестаҥҥа 268, Тываҕа 118, Приморскай кыраайга уонна Бурятияҕа 78-тыы, Красноярскай кыраайга 57, Калмыкияҕа 49, Иркутскай уобаласка уонна Саха сиригэр 32-лии, Хабаровскай кыраайга 28, Смоленскай уобаласка 3 оскуола баар эбит. Забайкальскай уонна Приморскай кыраайдар боппуруоһу халаан уутуттан сибээстээн быһаарбатахтарын иһитиннэрдэ. Саха сирэ ити боппуруоска улахан хардыыны оҥорбутун этэн аһарда. Ол курдук, биһиги өрөспүүбүлүкэбитигэр билиҥҥитэ сылаас тахсан киирэр сирэ суох 32 оскуола хаалбыт.

Премьер-миниистир өскөтүн балаҕан ыйын 1 күнүгэр диэри быһаарбатахтарына дуоһунастаах дьону эппиэтинэскэ тардар этиилэри толкуйдааҥ диэн сорудахтаата.

Людмила ПОПОВА, “Саха сирэ” хаһыат, edersaas.ru

This post was published on 31.08.2018 13:01 13:01