Ил Дархан Айсен Николаев ыйааҕынан Саха сиригэр кыра дохуоттаах нэһилиэнньэ ахсаанын аҕыйатыыга бырагыраама бигэргэннэ. 2020-2030 сыллары хабар. СИА-ҕа үлэ министиэристибэтэ иһитиннэрдэ.
Регионнааҕы бырагырааманан 34 тыһыынча кэриҥэ үлэ миэстэтин инвестиционнай бырайыактары олоххо киллэриигэ анаан таһаарар былаан турар. Үлэ миэстэтин таһаарыы, эбии үөрэхтээһини тэрийии 2030 сылга үлэтэ суох дьон ахсаана 5,4% диэри намтыырыгар тириэрдиэ.
Былаан быһыытынан нэһилиэнньэ дьарыктаах буолуутугар, предпринимательство сайдыытыгар, тыа хаһаайыстыбатын табаарын оҥорон таһаарыыга, социальнай өйөбүл, ол иһигэр оҕолоох ыалларга, нэһилиэнньэ олоҕун хаачыстыбатын тупсарыыга, кыра дохуоттаах дьон адаптацияларыгар ордук болҕомто ууран үлэ барыахтаах.
Бырагыраама олоххо киириитин суумата — 22,7 млрд солк.
Сүрүннээччилэринэн экономика уонна үлэ министиэристибэлэрэ буолаллар.
