Саха сирин баһылыга Айсен Николаев өрөспүүбүлүкэҕэ олоххо киирэр бырайыактарга бырабыыталыстыба чилиэннэрин тус эппиэтинэстэрин туһунан иһитиннэрдэ. Бу миниистирдэр кэбиниэттэрин үлэтин сүрүн бириинсиптэриттэн биирдэстэрэ. Маннык дьаһаныы салайыы атын таһымнарыгар эмиэ туһаныллыаҕа. Ил Түмэҥҥэ Анал этиитигэр өрөспүүбүлүкэ баһылыга регион сайдыытын сүрүн хайысхаларын торумнаата.
“Билигин үлэ саҥа бириинсипкэ олоҕуруо диэн бэлиэтиибин. Итинтэн сүрүннэрэ – толорооччулар тус эппиэтинэстэрэ. Саҕаламмыт бырайыактар умнуллар, быраҕыллар, ким да эппиэтинэһи сүкпэтэ диэн суох буолуохтаах”, — диэтэ кини.
Саха сирин баһылыга 2019 сылга Инвестиционнай этиитигэр бырабыыталыстыба чилиэннэрин бөдөҥ бырайыактары толорууга тус эппиэтинэстэрэ бигэргэммитин бэлиэтээтэ – Өлүөнэ муостатыттан Дьокуускайга социальнай эбийиэктэри тутууга тиийэ.
Санатан эттэххэ, Айсен Николаев “Саха сирэ, иннин диэки!” быыбар иннинээҕи бырагырааматын олоххо киллэриигэ туһуламмыт биэс ыйаахха илии баттаата. Ыйаахтарга өрөспүүбүлүкэ 2024 сылга диэри сайдыытын соруктара турдулар. Ону тэҥэ сотору кэминэн 2032 сылга диэри өрөспүүбүлүкэ социальнай-экэнэмиичэскэй сайдыытын саҥардыллыбыт бырайыага бигэргэниэҕэ. 2019 сыл бастакы кыбартаалыгар бары стратегическай хайысхаларга “суол каартата” бигэргэнэн, үлэҕэ киириэхтэрэ.
“Биһиги сүрүн сорукпут – өрөспүүбүлүкэ бары олохтоохторугар бэйэлэрин сыалларын олоххо киллэриигэ усулуобуйалары тэрийии. Аныгы кэм билиитин иҥэринэн, култуурунай нэһилиэстибэ нөҥүө доруобуйаны бөҕөргөтөн, манныкка тиийиэххэ сөп. Бастакы уочараттаах сорукпут – дьадайыыны суох оҥоруу, Саха сирин олохтоохторун дохуоттара бигэтик улаатыыта”, — диэн регион баһылыга бэлиэтээтэ.
Наталия Чемашкина.
This post was published on 17.12.2018 12:25 12:25