Саха сиригэр «Эн — предпринимательгын» диэн федеральнай бырагырааманы олоххо киллэрии саҕаланна. Бырайыак Арассыыйаҕа 2009 сылтан үлэлиир. Баҕа санаа буолан иитиэхтии сылдьыбыт былааны олоххо киллэрэн, дьоҕус бизнес эйгэтигэр хардыы оҥорон, бэйэ дьыалатын тэринэн, ыччаттар бырагыраамаҕа хото кытталлар.
Бу кэм устата Арассыыйа 53 регионугар 15-30 саастаах ыччаттар 16 000 саҥа тэрилтэлэри аһан үлэлэтэн, улахан бизнескэ дьоһуннаах хардыыны оҥордулар. 2017 сылга дойду 59 куоратыгар 2 900 ыччат дьоҕус бизнес тэрилтэлэрэ аһыллан үлэлэрин саҕалаабыттара үгүһү этэр.
— Былырыын биһиги бу бырагыраамаҕа эмиэ кыттыбыппыт. Сүрүн сорукпут — ыччаттарбытын Саха сиригэр, Арассыыйаҕа эрэ буолбакка, аан дойдутааҕы таһымҥа таһаарыы. Маннык тэрэээһиннэр регионнарга дьоҕус бизнеһи сайыннарыыга ыччаттары көҕүлүүр айылгылаах буолан, үгүс киһини интэриэһиргэтэр. Холобура, Саха сиригэр улуустарынан бэйэ дьыалатын сайыннарыыга ылсан үлэлиир ыччаты биирдиилээн өйөөн буолбакка, барыларын бииргэ түмэн киэҥ эйгэҕэ тахсалларыгар өйөбүл буолуохтаахпыт. Олус талааннаах ыччаттар тахсан эрэллэр. Кинилэри тоҕоостоох кэмҥэ таба көрөн, илиилэриттэн сиэтэн, ааттаах-суоллаах аан дойдутааҕы таһымнаах корпорациялары кытта билиһиннэрэр соруктаахпыт. Федеральнай суолталаах бырагыраамалар биһиэхэ онно суолу аһаллар. Онон, ыччаттарбыт, сонун сүүрээннэри тобулан, бэйэҕит толкуйгутун олоххо киллэрэн иһиҥ диэн ыҥырабыт. Мин эһигини кытта көрсөргө өрүү бэлэммин, — диэн бэлиэтээтэ ыччаттарга туһаайан СӨ Инвестиционнай сайдыыга уонна предпринимательство дьыалатыгар миниистирэ Антон Сафронов «Эн — предпринимательгын» диэн бырагыраама Саха сиригэр саҕаланар үөрүүлээх түгэнигэр.
Федеральнай бырагырааманы өрөспүүбүлүкэҕэ олоххо киллэриини «Бизнес-оскуола» автономнай тэрилтэ сүрүннүөҕэ.
Ол да иһин тэрилтэ салайааччыта Наталья Харенко суолталаах тэрээһини олус бэрткэ тэрийэн ыытта.
Владимир Ларионов аатынан орто оскуола Бизнес-инкубатордарын предпринимателлэрэ, 9-с кылаас үөрэнээччилэрэ лазер технологиятынан сувенирдары оҥорор Дайаана Сыроватская, футболкаҕа, маска, чааскыга бэчээт түһэрэр Варя Захарова, дизайнер Дайаана Игнатьева федеральнай таһымнаах бырагыраамаҕа кыттар баҕалаах Майаттан анаан бу тэрээһиҥҥэ кытта кэлбиттэр. Кыргыттар номнуо иккис сылларын үлэлииллэр эбит. Эдэр предпринимателлэр бэйэлэрин оҥоһуктарын миниистир Антон Сафроновка аҕалан бэлэхтээтилэр.
— Нолуок төлөөбөппүт. Биһиэхэ нолуокка бакаа «каникул», — диэн уопуттаах урбаанньыттар быһыытынан лоп-бааччы санааларын үллэстэллэр. Дьахтар күнүн бырааһынньыгар үлэлэрин атыылаан, биэстии тыһ. солк дохуоттанан, сүргэлэрэ көтөҕүллэн сылдьар. Кыргыттар номнуо «наставничество» диэн хайысхаҕа олохтоохтук ылсыбыттар. Холобура, Дайаана Сыроватская 5-с кылааска үөрэнэр урбаанньыт буоларга бэлэмнэнэр оҕоҕо түүҥҥү лаампаны (светильник) оҥорорго лазернай станокка үлэлэһэ сылдьар эбит. Эдэр предпринимателлэр ситиһиилэрин да киһи мыыммат. Ол курдук, кыргыттар WorldSkills Russia региональнай күрэҕэр бочуоттаах миэстэлэрдээхтэр. Дайаана Сыроватская «Лазернай технологиялар» диэн номинацияҕа бастаабыт. Дайаана Игнатьева «Графическай дизайн» көрүҥҥэ 2-с бириистээх миэстэлэммит. Варя Захарова оскуола оҕолорун өрөспүүбүлүкэтээҕи олимпиадатыгар бастыҥынан ааттаммыт.
Миниистир Антон Сафронов дьоҕус бизнес эйгэтигэр суолларын чаҕылхайдык солоон эрэр ыччаттары кытта көрсүһүүтүгэр:
— Өрөспүүбүлүкэбит аан дойду таһымнаах корпорациялар салайааччылары кытта ситимнээхтик үлэлиир. Онон ханнык баҕарар бөдөҥ бизнес-тэрилтэлэри кытта эһиги саҕалааһыннаргытын билиһиннэрэн, сайдыы суолун кэҥэтиэхпитин сөп. Холобура, Мичил НЕУСТРОЕВ (GYTEC) диэн кэскиллээх эдэр урбаанньыт уонна SAFT Russia салайааччыта Дэвид МАСГРАНГЕЗ биһиги билсиһиннэриибитинэн анаан көрсөн тураллар. Онон билигин «Саха сиригэр оҥоһулунна» диэн бренди сайыннаран, араас бизнес-идиэйэҕитинэн, толкуйгутунан тахсарга эһиэхэ өрүү «күөх уот» умайар, — диэн анаан бэлиэтээтэ.
