НВК САХА — Саха сиригэр 9000 кэриҥэ элбэх оҕолоох ыал олорор. Кинилэргэ 255 мөллүйүөн солкуобай көмө көрүллүөҕэ. Бу туһунан Ил Дархан уонна бырабыыталыстыба пресс-сулууспата иһитиннэрэр.
Саха сирин бастакы вице-премьера Алексей Стручков иһитиннэрбитинэн, социальнай контракка олоҕуран, өрөспүүбүлүкэҕэ судаарыстыбаннай социальнай көмөнү оҥорууну кэҥэтии бырайыагын үлэтэ салҕаныаҕа.
Бу үп 90%-на тыа сирин олохтоохторо урбаан уонна кэтэх хаһаайыстыба тэринэн сайыннарыылларыгар ыытыллар көмөҕө туһаайыллар. Бастакы уочарат элбэх оҕолоох дьиэ кэргэн болҕомтоҕо ылыллар.
«2018 сылга бу хайысхаҕа 200 мөлүйүөн солкуобай көрүллүбүт эбит буоллаҕына, бүгүн социальнай контрактары үбүлээһини 255 мөллүйүөҥҥэ диэри улаатыннарар туһунан быһарыы ылылынна. Саха сирин тоҕус тыһыынча кэриҥэ ыала бу көмөнү тутар кыахтанна», — диир Алексей Стручков.
Ону тэҥэ, биэс эбэтэр онтон элбэх оҕолоох ыал дьиэ ылыналларыгар, эбэтэр дьиэ тутталларыгар көмө оҥоруутун үбүлээһинэ 350 мөлүйүөн солкуобайга диэри үрдээтэ диэн бэлиэтэнэр.
Источник: http://nvk-online.ru
