Дьон быраабын көмүскээһин боппуруостара – элбэх кыбартыыралаах дьиэлэргэ өлүүлэһэн тутуу кыттыылаахтарын боппуруостара борокуратуура, судаарыстыбаннай былаас уонна олохтоох салайыныы биэдэмистибэлэр икки ардыларынааҕы сүбэ мунньахтарыгар Саха сирин премьерэ Владимир Солодов салалтатынан дьүүллэһилиннэ.
Өрөспүүбүлүкэ тутууга миниистирэ Павел Аргунов иһитиннэрбитинэн, ааспыт сылга тэҥнээтэххэ, өлүүлэһэн тутууга кыһалҕалаах эбийиэктэр ахсааннара 16-тан алтаҕа диэри аччаабыт. Маны сэргэ сэттэ кутталлаах эбийиэк баар. Министиэристибэ чахчытынан, албыннаппыт дьон ахсаана —584 киһи.
Владимир Солодов борокуратуура, быраабы араҥаччылыыр уорганнар бу боппуруоска болҕомтолоохтук сыһыаннаһалларын иһин махтанна.
“Өрөспүүбүлүкэ бырабыыталыстыбатын соруга, бастатан туран, бу үлэни сүрүннүөхтээх, ол эрээри сир учаастактарын биэрии уонна атын чопчу боппуруостары быһаарыыга кыттар олохтоох салайыныы уорганнарын солбуйбакка туран. Тустаах үлэ өрөспүүбүлүкэҕэ күүһүрүөҕэ”, — диэтэ Солодов.
Өлүүлэһэн тутуу – саамай табыгастаах, дьиэ-уот боппуруоһун түргэнник быһаарар ньыма, диэн миниистирдэр кэбиниэттэрин баһылыга санатта. Владимир Солодов өрөспүүбүлүкэ иннигэр дьиэ тутуутун тэтимин улаатыннарар сорук турар – судаарыстыба баһылыгын сорудаҕын толоруу, оттон атын өттүттэн – ырыынакка суобаһа суох тутааччылары киллэрбэт буолуу. Владимир Викторович саныырынан, өлүүлэһэн тутууга көҥүлү ылыы ирдэбилин кытаатыннарыы – сөптөөх быһаарыныы, ол эрээри дьиэни тутан үлэҕэ киллэриигэ сабыдыаллаабатын курдук, сөбүн көрөн дьаһаныллыахтаах. Бу дойду субъектарыгар бэриллэр үптэн саамай ботуччу суума. Тустаах бырагыраама өлүүлэһэн тутуу ньыматынан тутуллубут, кыайан атыыламмакка турар дьиэлэри батарыыга көмөлөһүөҕэ.
Бырабыыталыстыба бэрэссэдээтэлэ дьиэ-уот ырыынагын сайдыытын тутаах ньымаларыттан биирдэстэринэн дьону саахалланар уонна хаарбах дьиэттэн көһөрүү буоларын санатта. Маныаха Саха сирэ 2024 сылга диэри 60 млдрд кэриҥэ солкуобайы ылыахтаах.
“Биһиги гражданнар кэһиллибит бырааптарын чөлүгэр түһэриигэ көмөлөһүөхтээхпит. Бу накаастабылга эмиэ сыһыаннаах. Тустаах үлэни күүһүрдүөхтээхпит, тахсыбыт хоромньу иһин накаастабыл уонна
эппиэтинэһи ирдээһин баарын көрдөрөр туһугар”, — диэтэ премьер-миниистир.
Владимир Солодов өрөспүүбүлүкэ бүддьүөтүттэн албыннаппыт дьон кыһалҕатын быһаарыыга бэриллэр үбүлээһин кээмэйин боппуруоһун таарыйда. Маныаха кини суобаһа суох тутааччылар оннуларыгар гражданнарга дьиэни тутуу өрөспүүбүлүкэ бүддьүөтүн эбээһинэһэ буолбатаҕын санатта.
“Биһиги масыанньыктыы дьайыылартан эмсэҕэлээбит гражданнарга көмөлөһүөхтээхпит. Ол эрээри бу өрөспүүбүлүкэ бэйэтин суотугар дьиэлэри ситэрэн киллэриэхтээх диэн буолбатах. Бырабыыталыстыба кэккэ оройуоннарга оннук гынара ити биһиги кыахпыт иһинэн оҥоһуллар көмө. Өрөспүүбүлүкэ бары дьиэлэри тутууга толору кээмэйинэн үбү биэрэр кыаҕа суох. Олох муҥур уһугар субсидиялары биэрэбит, олор эмсэҕэлээбит гражданнарга бэриллиэхтээхтэр, тутааччылары өйөөн буолбатах. Сыалбыт – масыанньыктыы дьайыылартан эмсэҕэлээбит дьоҥҥо көмөлөһүү, эбийиэктэри ситэрии буолбатах. Маны болҕомтоҕо ылыахтааххыт. Ол аата өрөспүүбүлүкэ бу кыһалҕаны быһаарыыга үбү биэрбэт диэн өйдүө суохтааххыт. Төттөрүтүн бу хайысхаҕа үлэни күүһүрдүөхпүт. Кэлэр сылга үс төгүл элбэх үп көрүллүөҕэ – 150 мөлүйүөн солкуобай. Бүддьүөт уустук кэмигэр бу үгүөрү үп”, — диэн сиһилии быһаарда Солодов.
Миниистирдэр кэбиниэттэрин баһылыга бэлиэтээбитинэн, бу үлэҕэ быраап уонна үп өттүнэн сырдатар үлэ күүскэ ыытыллыахтаах. Гражданин бу тутааччыттан атыылаһарын дуу, суоҕун дуу бэйэтэ быһаарыахтаах.
СИА.
This post was published on 14.12.2018 10:34 10:34