Саха сиригэр быйыл 500 тыһыынча тонна кэриҥэ оту бэлэмниэхтэрэ

0
91

Өрөспүүбүлүкэҕэ сайыҥҥы бырааһынньыктар кэннилэриттэн тута сүөһү аһылыгын бэлэмнээһин саҕаланыа. Быйылгы дьылга былаан — 484 972 т от, 18 902 т сиилэс уонна 11 850 т сенаж.


Күүстээх от үлэтэ элбэх сүөһүлээх, сылгылаах сиргэ ордук күүскэ ыытыллара былааннанар. Өрөспүүбүлүкэ тыатын хаһаайыстыбатын министиэристибэтэ иһитиннэрэринэн, Мэҥэ Хаҥалас улууһа 13 246 т оту, 2 000 т сиилэһи уонна 1 150 т сенаһы бэлэмниэхтээх. Онтон Чурапчы улууһугар 40 983 т от, 800 т сиилэс хомуллуохтаах.

30 тыһ. тоннаттан элбэх оту Сунтаарга (35 378 т), Тааттаҕа (36 531 т), Уус Алдаҥҥа (35 466 т), Аммаҕа (31 469 т), Намҥа (30 458 т), Ньурбаҕа (32 738 т) хомуйуохтара.

Хотугу эргимтэ улуустарыгар окко былаан эмиэ тириэрдиллэн турар.

Муниципалитеттар баар ходуһаларыттан муҥутуур төһөнү ылыахтарын сөбүн суоттаан былаан оҥоһуллубут. Саппааска  хаалара эмиэ учуоттаммыт.

«Хас биирдии улууһу кытта тыа хаһаайыстыбатын саамай сүрүн хампаанньатын дьоһуннаахтык ыытарга үлэ барда. Ыраах ходуһаларга тиийэр суол уонна муосталар өрөмүөннэннилэр. Күрүөлэр тутулуннулар, сиилэс траншеялара тардылынна, массыына уматыга тириэрдилиннэ, сиилэстээһиҥҥэ уонна сенаһы оҥорууга анал матырыйаалларынан хаһаайыстыбалар хааччылыннылар. Онон бары от үлэтигэр бэлэмнэр«, — диэн иһитиннэрэр Саха сиринээҕи тыа хаһаайыстыбатын министиэристибэтэ.

0
0
[the_ad_group id="742"]