Гидрометеосулууспа быһаарыытынан, Саха сиригэр баһаар куттала улахан. Бу туһунан регионнааҕы ЫБММ пресс-сулууспатын салайааччыта Ксения Рахматулина социальнай ситимнэргэ быһа эфиргэ эттэ, СИА суруйар.
«Гидрометеосулууспа управлениетын барыллаан борогунуоһунан, өрөспүүбүлүкэҕэ баһаар куттала улахан — бэһис уонна төрдүс кылаастаах. Кэлэр нэдиэлэ устата балаһыанньа маннык буолара күүтүллэр. Биһиэхэ айылҕа баһаарын туруута элбиэҕэ. Бэлиэтээһин эрдэ биллибитэ, нэһилиэнньэҕэ иһитиннэрбиппит — 11 хоту улууска уот туруутун балаһыанньа ыараханын. Бу биһиги уонна атын кэтээн көрөр уоргаттар быһаарыыларынан биллибитэ, онон эрдэттэн сэрэтэр үлэ ыытыллыбыта», – диэтэ Ксения Рахматулина.
Кини эппитинэн, ыарахан балаһыанньа Орто Халыма, Үөһээ Халыма, Томпо, Эбээн-Бытантай оройуоттарыгар бэлиэтэнэр, манна 92 баһаар баар, 300 тыһыынча гектары хабар.
От ыйын 8 күнүнээҕи туругунан, экология министиэристибэтэ иһитиннэрэринэн, өрөспүүбүлүкэҕэ 17 ойуур баһаарын умуруорууга миэрэлэр ылыллаллар, онтон 12 тохтотулунна.
