29 Кулун тутар 29.03
  • -14°
  • $ 92,26
  • 99,71

Саха сиригэр ахсынньыга хапсаҕайга улахан турнирдар ыытыллыахтара

14:56, 28 ноября 2019
Текст:
Читайте нас на
Яндекс Новости
ЯДВ

Ааһан эрэр сыл бүтэһик ыйыгар өрөспүүбүлүкэ таһымнаах хапсаҕайга хас да улахан күрэхтэһии буолуоҕа. Ахсынньыга сыаналаах бириистэрдээх аҕыс турнир былааннанар. Сиһилии — СИА сирэйигэр.


Алексей Никифоров аатыгар бастыыр иһин турнир

«Модун» спорткомплекска сэтинньи 30 — ахсынньы 1 күннэригэр 1996-2002 сыллардааҕы төрүөх уолаттарга тус уонна хамаанданан бастыыр иһин өрөспүүбүлүкэтээҕи турнир ыытыллар. Хапсаҕайга спорт маастара, Уһук Илиҥҥэ, Саха сиригэр самбоҕа уонна ММА чөмпүйүөн уонна призер Алексей Никифоров сырдык кэриэһигэр ананар.

«Бүлүү Кубога» Леонид Николаев бирииһигэр

Бүлүү улууһун Халбаакытыгар сэтинньи 30 ахсынньы 1 күннэригэр «Бүлүү Кубога» күүстээх хапсаҕайдьыттары түмсүөхтэрэ. ФКуоС үтүөлээх үлэһитэ Леонид Николаев бирииһэ. Көбүөргэ уолаттар, эр дьон уонна бэтэрээннэр тахсыахтара, 16 ыйааһын былааннанар. «Стенка на стенку» киэбинэн Бүлүү, Үөһээ Бүлүү, Горнай, Сунтаар, Ньурба, Ленскэй улуустара кыттыахтара.

Владимир Андросов турнира

Таатта улууһун Ытык-Күөлэ ССРС үс төгүллээх чөмпүйүөнэ Владимир Андросов сырдык кэриэһигэр ыытыллар «А» кылааска турнирга ыҥырар. Күрэхтэһии сэтинньи 30 күнүгэр саҕаланыа, ахсынньы 1 күнүгэр түмүктэниэ. 2012 сыллааҕы хапсаҕай быраабылатынан барыа.

Савелий Оконешников турнира

ФКуоС туйгуна Савелий Оконешников сырдык кэриэһигэр анаммыт турнир Өймөкөөн Томторугар ахсынньы 5-6 күннэригэр буолуоҕа. Тэрийээччилэртэн биирдэстэринэн Саха сирин хапсаҕайга сүүмэрдэммит хамаандатын үрдүкү тренерин э.т. Александр Оконешников кыттар.

Турнир урукку быраабылаларынан ыытыллар. 2005 сыллааҕы төрүөх уолаттар, 2002-2004 сыллааҕы төрүөх спортсменнар уонна 18 сааһыттан үөһэлэр көбүөргэ тахсаллар. Муҥутуур кыайыылааҕы быһаарыахтара.

Роман Цыпандин турнира

ССРС уонна Саха сирин спордун маастара Роман Цыпандин аатыгар биллэр турнир Мэҥэ Хаҥалас улууһун Майа сэлиэнньэтигэр ахсынньы 7-8 күннэригэр ыытыллыаҕа. 2002-2003 сыллааҕы төрүөх уолаттар, эр дьон уонна бэтэрээннэр (40-тан үөһэ) кытталлар. 16 ыйааһын оонньонуоҕа, экспериментальнай быраабыланан.

Федерация Кубога

Быйылгы Кубок Горнай улууһун Бэрдьигэстээҕэр ахсынньы 14-15 күннэригэр ыытыллыаҕа. Тааттаттан, Үөһээ Бүлүүттэн, Чурапчыттан, Мэҥэ Хаҥаластан, Кэбээйиттэн, Дьааҥыттан, Намтан, Хаҥаластан, Горнайтан, Уус Алдантан, Сунтаартан уонна Дьокуускай куораттан кыттыахтара. Хас биирдии хамаандаҕа 17 хапсаҕайдьыт киирэр.

Кыайыылаах Кубогы уонна 200 тыһ.солк. илдьэ барыа. Иккистэргэ — 150 тыһ., боруонсаларга — 100 тыһ.солк.

Санатар эбит буоллахха, икки сыл субуруччу Станислав Афанасьев салайааччылаах Дьокуускай хамаандата Кубогы кыайар. Быйыл ыллаҕына, хамаандаҕа хаалар.

«АЛРОСА» АХ Кубога

Ньурба улууһун Антоновкатыгар ахсынньы 20-22 күннэригэр аан бастаан «АЛРОСА» АХ Кубога ыытыллыа. Муниципалитеттар биэстии киһилээх сүүмэрдэммит хамаанадалара кыттыахтара. Улуустар иккилии хамаанданы кытыннараллара көҥүл. Хаһаайыттар — түөрт.

Бастаабыт хамаанда — 200 тыһ.солк, призердар 150 уонна 100 тыһ.солк. туһааннааҕынан. Икки категорияҕа муҥутуур кыайыылааҕы быһаарыахтара, чөмпүйүөннэр 50-нуу тыһ.солк. тутуохтара.

«Нэһилиэк» бырайыак 

Дьокуускайга «Дохсун» спорткомплекска ахсынньы 21-22 күннэригэр Саха сирин нэһилиэктэрин хамаанданан хапсаҕайга киирсиилэрэ ыытыллыа. РФ Федеральнай мунньаҕын Сэбиэтин аграрнай бэлиитикэҕэ кэмитиэтин бэрэссэдээтэлин солбуйааччы  Егор Борисов бирииһэ.

Нэһилиэктэртэн эрэ хапсаҕайдьыттар кытталлар. 3500 киһини аһардар нэһилиэнньэлээх оройуоттар кииннэриттэн, куораттартан, бөһүөлэктэртэн кыттар көҥүллэммэт. Спорт маастардара, кандидаттар, өрөспүүбүлүкэ таһыгар кыттыбыт атлеттар, физкультура институттарыгар үөрэнэнээччтлэр эмиэ кыттыбаттар.

Сүрүн бириис — УАЗ-микрооптуобус.

Следите за самым важным и интересным в Telegram-канале и WhatsApp-группе ЯСИА