Өрөспүүбүлүкэ ойуур сыһыаннаһыыларыгар департаменын көрдөрүүтүнэн, от ыйын 24 күнүгэр Саха сирин харыстанар сиригэр-уотугар 11 ойуур баһаара баара бэлиэтэнэр, 18 216,2 гектар иэннээх сири тайыыр.
Санатар эбит буоллахха, Россия ЫБМС баһылыга Владимир Пучков ыксаллаах суһал балаһыанньаҕа бырабыыталыстыба хамыыһыйатын мунньаҕар Саха сирин соҕуруу өттүгэр уот туруутун оһуобай хонтуруолга ылар туһунан модьуйбута.
«Саха сирин соҕуруу өттүгэр уот туруутун балаһыанньата өрөспүүбүлүкэтээҕи туһааннаах хамыыһыйа уонна миэстэтигэр баар сулууспалар тохтоло суох хонтуруолларыгар ылыллыахтаах«, — диэбитэ Пучков.
ЫБМС регионнааҕы управлениета иһитиннэрбитинэн, сыл саҕаланыаҕыттан ойуур фондатыгар баар уот туруон сөптөөх 20 оройуон сирэ-уота бэлиэтэммитэ: Алдан, Амма, Үөһээ Бүлүү, Бүлүү, Горнай, Ленскэй, Мэҥэ-Хаҥалас, Мирнэй, Нам, Нерюнгри, Ньурба, Сангаар, Сунтаар, Өлүөхүмэ, Таатта, Уус Алдан, Уус-Майа, Хаҥалас, Чурапчы уонна Дьокуускай лесничестволарыгар.
Ыам ыйын 15 күнүттэн Дьааҥы, Эдьигээн, Индигир, Халыма, Томпо лесничестволарын кыраныыссалара эбиллибиттэрэ.
Баһаары умуруорууга 435 киһи ыҥырыллыбыт, ол иһигэр 258 Авиалесоохрана баһаарынай сулууспатын исписэлиистэрэ, 91 лесничестволар уонна баһаар-химия станцияларын үлэһиттэрэ, 70 олохтоох дьон, 16 ЫБМС сотрудниктара. 26 сиринэн сылдьар техника туттуллубут.
Сыл саҕаланыаҕыттан Саха сиригэр барыта 40 571,9 гектар иэннээх сири сабардыыр 218 ойуур баһаара бэлиэтэммит.
