Российскай Федерация бырабыыталыстыбата дойду регионнарыгар 1258 суһал көмө массыынатын анаата. Саха сиригэр 11 кэлэр диэн, СИА өрөспүүбүлүкэ сүрүн пресс-сулууспатыгар сигэнэн суруйар.
Анал тырааныспардары регионнарга биэрэр туһунан дьаһалга Россия премьер-миниистирэ Михаил Мишустин муус устар 18 күнүгэр илии баттаата.
Дьаһалы 2020 сылга РФ промышленноска уонна атыыга министиэристибэтэ толоруоҕа. Үс Россия хампаанньата кыттар – «Форд Соллерс Елабуга» ХЭУо, «Автомобильный завод «ГАЗ» ХЭУо уонна «Ульяновский автомобильный завод» ХЭУо.
Суһал көмө массыыналарын РФ субъектарыгар барыларыгар тириэрдэр соруктаахтар. Дьаһал быһыытынан, Саха сиригэр 11 техника кэлиэхтээх.
Россия бырабыыталыстыбата саппаас фондатыттан регионнар туһаларыгар массыыналары ылыыга 5,2 млрд солк тыырбыта.
