Арассыыйа күнүн сарсыарда Ил Дархан э.б.к.т. Айсен Николаев Хоккайдо (Япония) вице-губернатора Ясухиро Цудзины кытары көрүстэ. Айсен Николаев Арассыыйаҕа Япония сылын, Японияҕа Арассыыйа сылын чэрчитинэн, бу дойду дэлэгээссийэтэ кэлбитин иһин махталын биллэрдэ.
Ясухиро Цудзи бу сырыы былырыын Саха Өрөспүүбүлүкэтин бырабыыталыстыбатын бэрэссэдээтэлэ Евгений Чекин Хоккайдоҕа сырыытыгар харда буоларын эттэ, Федерация сэбиэтин чилиэнэ Александр Акимовка уо.д.а. Хоккайдо губернаторствотыгар тиийэ сылдьыбыт дьоҥҥо махтанна.
Айсен Николаев:
– Судаарыстыбалар икки ардыларыгар сыһыан тупсан, күүһүрэн иһэрэ Арассыыйа эрэгийиэннэрэ Япония префектураларын кытары бииргэ үлэлээһиннэригэр эмиэ дьайар. Саха Өрөспүүбүлүкэтэ Уһун Илиҥҥи федеральнай уокурук састаабыгар киирэр Арассыыйа субъегын быһыытынан, Япониятааҕы партнердары кытары бииргэ үлэлээһин кэҥииригэр интэриэстээх. Үөрэхтээһин, наука, култуура уонна спорт эйгэтинэн үлэ кэҥиир. Дьыалабыай бииргэ үлэлээһин ураты болҕомтоҕо сылдьар. Ол курдук, 2016 с. Япония технологиятынан сылы эргиччи үлэлиир тэпилииссэ комплекса үлэҕэ киллэриллибитэ. 2017 с. Илиҥҥи экономическай форум чэрчитинэн «Хоккайдо Корпорэйшн» хампаанньаны кытары түһэрсиллибит сөбүлэһиинэн, Дьокуускайга эһиил медицина тобоҕун уматар собуот үлэҕэ киллэриллиэхтээх.
Салгыы кэпсэтии инвестбырайыактарга туһаайылынна. Кэлэр өттүгэр өссө биир саҥа тэпилииссэ Хаҥалас улууһугар оҥоһуллара, «Алмаасэргиэнбаан» үбү тардар туһугар «Хоккайдо Банк Лтд.» хампаанньаны кытары үлэтин кэҥэтэргэ былаанныыра этилиннэ. Маны таһынан, бэс ыйын 23-25 күннэригэр Саха сиригэр Арасыыйа, Япония бииргэ үлэлээһиҥҥэ парламеннар уонна эрэгийиэннэр икки ардыларынааҕы Консультативнай сэбиэтин итиэннэ Япония парламенын сүбэһиттэрин балаататын «Дискуссионнай кулуубун» үһүс мунньаҕа ыытыллыахтаах. Онно бөҕү таҥастааһын научнай өттүн быһаарар сөбүлэһиигэ «Хоккайдо Корпорэйшн» уонна олох-дьаһах тобоҕун дьаһайарга үлэлиир эрэгийиэннээҕи оператор илии баттаһыахтаахтар.
Айсен Николаев Япония премьер-миниистирэ Синдзо Абэ Санкт-Петербурга ыытыллыбыт экономика аан дойдутааҕы форумугар Япония уонна Арассыыйа билигин история эппиэттээх түһүмэҕэр тиийэн туралларын туһунан эппитин санатта уонна бииргэ үлэлээһини дириҥэтэн, күүһүрдэн, кэлэр көлүөнэ ыччаттарга анаан үлэлииргэ ыҥырда. Биһиги саҥа бырайыактарга үлэлииргэ бэлэммит диэтэ.
Раиса СИБИРЯКОВА, «Саха сирэ» хаһыат, edersaas.ru
Андрей Сорокин, СИА хаартыскаҕа түһэриитэ.
