Илиҥҥи экономическай иккис форумҥа РФ култуураҕа министиэристибэтэ Уһук Илин уонна Байкал уокуруктарын кытта «Россия илиҥҥи иитэ» («Восточное кольцо России») туристическай хайысхалаах бырайыак туһунан сөбүлэһиини түһэристэ.
«Өссө сэбиэскэй кэм саҕана дойдуга туризм биир хайысхата — «Кыһыл көмүс ии» («Золотое кольцо») баара. Манна нуучча былыргы куораттара киирэллэрэ.
Кэлиҥҥи түөрт сылга маныаха майгынныыры оҥордубут. Ону туристическай агентстволар көдьүүстээхтик атыылыыллар. Татарстаҥҥа, Крымҥа интэриэһинэй бырайыактар бааллар. Уһук Илин ханна да суох кыахтаах, онон “Россия илиҥҥи иитэ”(«Восточное кольцо России») тэрийэр туһунан санаа үөскээбитэ. Манна турист Уһук Илин хас да регионугар сылдьыан сөп. Ити логистика өттүнэн судургута суох, ол эрээри губернатордар өйөөтөхтөрүнэ, турагенстволар интэриэһиргээтэхтэринэ, табыллар суол», — диэн суруналыыстарга култуура миниистирэ Владимир Мединскэй эттэ.
Дуогабарга култуура министиэристибэтэ, Ростуризм, ону таһынан Приморскай, Хабаровскай кыраайдар, Еврейскэй автономнай, Камчатка, Сахалин, Иркутскай, Амур, Магадан, Чукотка автономнай уобаластара уонна өрөспүүбүлүкэлэр Бурятия уонна Саха сирэ илии баттаатылар.
