Саха сирин баһылыга Егор Борисов уонна Хабаровскай кыраай губернатора Вячеслав Шпорт түһэрсибит дуогабардарынан икки регион сайдыыларыгар улахан суолталаах «Амма» суолу тутууну салҕыахтара. Инникитин бу суолга федеральнай анал турук бэриллиэҕэ.
«Саха сирин уонна Хабаровскай кыраайы ситимниир «Амма» суол Хабаровскайдааҕы Аян пуордугар тахсары хааччыйыаҕа», — диэн Егор Борисов саайтыгар суруллар.
Субъектар баһылыктара бастайааннай төрүккэ үлэлиир хамыыһыйаны тэрийиэхтэрэ, Нелькан нөҥүө Аян пуордугар тахсар суолу тутууну салҕыахтара.
«Уус-Маайаҕа көмүстээх, өҥнөөх металлаах, о.д.а баайдаах сирдэр бааллар. Бу Уһук Илин сайдыытыгар улахан суолталаах», — диэтэ Егор Борисов.
Вячеслав Шпорт бэлиэтииринэн, инникитин Хабаровскайтан ити суолунан тиэхиньикэ, муора бастакы суортаах бородууксуйата кэлиэҕэ. Ону таһынан туризымы сайыннарыыга суол сүрүн олугу ууруоҕа. Билигин «Амма» суолга Амма – Усть-Маайа – Эльдикан хайысханан суол быстан турар. Онно саҥа технологиялары, матырыйааллары туһаныыга Хабаровскай кыраай тэрилтэлэрин уопута туттуллуоҕа.
