28 Кулун тутар 28.03
  • -11°
  • $ 92,59
  • 100,27

Саха Өрөспүүбүлүкэтин Ил Дархана Айсен Николаев Россия күнүнэн эҕэрдэлиир

09:43, 12 июня 2020
Текст:
Читайте нас на
Яндекс Новости
ЯДВ

Ытыктабыллаах Саха сирин олохтоохторо! Саха Өрөспүүбүлүкэтин салалтатын аатыттан уонна тус бэйэм ааппыттан Россия күнүнэн эҕэрдэлиибин!


Бу судаарыстыбаннай бырааһынньык биир кэлим историябытын, саҥа суолу талбыт дойду күүһүн чөлүгэр түһэриини, Россия судаарыстыбаннаһын бөҕөргөтүүнү кэрэһилиир 30 сыллааҕыта, 1990 сыл бэс ыйын 12 күнүгэр, Россия саҥа историята саҕаламмыта – бу күн РСФСР судаарыстыбаннай суверенитетын туһунан Декларация ылыллыбыта. Ааспыт сыллар усталарыгар история үгэстэригэр, элбэх омук иллээх олоҕор уонна сомоҕолоһор күүһүгэр тирэҕирэн дойдубут тэтимнээхтик сайынна.

Быйыл биһиги дойдубут Улуу Кыайыы 75 сылын бэлиэтээтэ. Ийэ дойдубут дьылҕатын туһугар үрдүк эппиэтинэспитин, олорон ааспыт көлүөнэлэри кытта быстыбат ситиммитин, төрөөбүт дойдуга бэриниилээх буолуу утумун модун күүһүн көрдөрдүбүт.

Аҕыйах хонугунан Россия Федерациятын Конституциятыгар уларытыылары киллэриигэ Бүтүн Россиятааҕы куоластааһын ыытыллыаҕа. Россия Президенэ Владимир Путин сүрүн сокуоҥҥа Россия Федерациятын суверенитетын уонна сирин-уотун биир кэлимин, история кырдьыгын уонна дойду бары норуоттарын ураты култуураларын көмүскээһин, социальнай мэктиэлэри кэҥэтии, оҕо сааһы өйөөһүн курдук тутаах уларытыылары киллэриини көҕүлээбитэ. Олохпутугар салайтарар сүрүн сокуоммутугар уларытыылары өйүүр инниттэн Саха сирин олохтоохторо Бүтүн Россиятааҕы куоластааһыҥҥа көхтөөхтүк кыттыахтара диэн бигэтик эрэнэбин.

Саха сирэ Россия Федерациятын саамай бөдөҥ регионун быһыытынан судаарыстыба Уһук Илиҥҥэ ыытар экономическай бэлиитикэтин уонна социальнай эйгэҕэ национальнай соруктары олоххо киллэриигэ быһаччы кыттар. Биһигини барыбытын Аҕа дойдуга таптал, дойдубут сайдарын туһугар айымньылаах үлэ, үүнэр көлүөнэҕэ истиҥ сыһыан сомоҕолуур.

Эһиэхэ эйэлээх олоҕу, этэҥҥэ буолууну, Улуу Россия чэчирии сайдарын туһугар таһаарыылаах үлэни-хамнаһы, бары саҕалааһыннаргытыгар ситиһиини баҕарабын!

Саха Өрөспүүбүлүкэтин Ил Дархана Айсен Николаев

Следите за самым важным и интересным в Telegram-канале и WhatsApp-группе ЯСИА