Ытыктабыллаах Саха сирин олохтоохторо! Күндү биир дойдулаахтарым! Эһигини бука барыгытын Үрүҥ Тунах ыһыаҕынан итиитик-истиҥник эҕэрдэлиибин!
Үрүҥ түүннэр сырдыктарыгар бигэммит улаҕата биллибэт киэҥ нэлэмэн Саха сиригэр олох саҥаттан тыллыытын кэрэһилиир самаан сайын саҕаланыытыгар үтүөкэн бэйэлээх Ыһыахпыт ыһыллар. Маннык сырдык күннэргэ өбүгэлэрбит түҥ былыргыттан тыыннаах илдьэ кэлбит үгэстэринэн төрөөбүт айылҕабытын, тулалыыр эйгэбитин кытта биир ситиммитинэн кынаттанан Айыыларбытыгар үҥэн-сүктэн алгыстарын көрдөһөбүт.
Ыһыах маннык тымныы кыһыннаах дойду тыйыс ыарахаттарын аахсыбакка үгүс үйэлэри бииргэ туораан кэлбит норуоттар модун санааларын, олоххо дьулуурдарын өйдүүр-сыаналыыр кыаҕы биэрэр. Быйыл кутталлаах ыарыы аан дойдуну атыйахтаах уу курдук аймаата, күннээҕи олохторун уйгуурта, дьон доруобуйатын туһугар охсуһууну инники күөҥҥэ таһаарда. Ол иһин өрөспүүбүлүкэ ытыктанар бырааһынньыгын быйыл атыннык бэлиэтиибит. Олоҥхо ыһыаҕа Өлүөхүмэҕэ эһиил булгуччу ыытыллыаҕа. Бу ыһыахха оройуон бары олохтоохторо бэлэмнэммиттэрэ эбээт. Россия саамай бөдөҥ национальнай бырааһынньыгынан билиниллибит Туймаада ыһыаҕа онлайн көрүҥүнэн ыытыллыаҕа.
Үрүҥ Тунах Ыһыахпыт үөрүүтүн туох да күлүгүрдүө суоҕа, хас биирдиибит сүрэҕэр, дууһатыгар кини тыыннаах. Биһиги норуоппут суостаах да, дьоллоох да кэмнэри туораан кэллэ, ол эрээри саргылаах сарсыҥҥы күҥҥэ эрэлин хаһан да сүтэрбэтэҕэ. Тымныы кыһыны хайаан да чаҕылхай күн сардаҥаларынан оонньуур сайын солбуйар. Ол туоһута – биһиги Ыһыахпыт!
Улуу Кыайыы 75 сылыгар биһиги долгуйа уонна киэн тутта 1945 сыллаах номоххо киирбит Кыайыы ыһыахтарын саныыбыт. Онно сындалҕаны аахсыбакка, тыылга үлэлээбит норуоппут аан дойдуну фашизм дьайыттан босхолообут буойуттарын айхаллаабыта, кыайыыны уруйдаабыта, мустубут бар дьонун сомоҕо күүһүттэн күүс ылыммыта.
Ол курдук быйыл эмиэ Ыһыах күнүгэр, төһө да оһуохай түһүлгэтигэр киирэн илии илииттэн ылсыбатарбыт, өйбүтүнэн-санаабытынан, хардарыта өйөһүүбүтүнэн бары бииргэ буолуохпут. Ыһыах элбэх омуктаах Саха сирин норуоттарын түмэр, биһиги норуоппут ыалдьытымсах майгытын кэрэһилиир, киэҥ дууһабытын арыйар.
Оннук буола да туруоҕа! Тыа сирин хас биирдии сэлиэнньэтин, хас биирдии куораты, төрөөбүт өрөспүүбүлүкэбитин, ол аата улуу Россияны барытын сайыннарарбытыгар, олох устун эрэллээхтик бары тэҥҥэ хаамарбытыгар, айарбытыгар-тутарбытыгар олоххо дьулууру түстүүр Ыһыах тыына күүспүтүгэр күүһү эбиэҕэ, санаабытын кынаттыаҕа!
Күндү доҕоттор! Ыһыах дьон сүрэҕэр үөрүүнү уонна тапталы уйалыахтын. Эһиэхэ уонна эһиги чугас дьоҥҥутугар эйэлээх олоҕу уонна бары үтүөнү, ситиһиини баҕарабын!
Үрүҥ Тунах Ыһыахпыт норуоппут санаатын күүһүртүн, дьоҥҥо-сэргэҕэ бигэ туругу, үрдүк ситиһиини, дьолу тосхойдун!
Уруй-туску! Айхал-мичил!
Саха Өрөспүүбүлүкэтин Ил Дархана Айсен Николаев
