Алтынньы 8 күнүгэр саха тэлэбиидьэнньэтин 56 сылын көрсө, “Саха” национальнай көрдөрөр-иһитиннэрэр хампаанньа түмэлигэр виртуальнай экспозиция истиэндэтэ үлэлиэҕэ.
Ол курдук Саха сиригэр 30-с сыллартан саҕалаан араадьыйа уонна тэлэбиидьэнньэ сайдыбыт историятын көрдөрүөхтэрэ. Түмэлгэ киһи көрөн сэргиирэ олус элбэх, телестудия кэлэктиибин иһинэн оннооҕор 90 киһилээх симфоническай оркестр үлэлээбитэ.
Түмэлгэ экспонат арааһа хараллыбыт, ол курдук бастакы японскай видеотехника, урукку магнитофоннар… Ону таһынан биллэр ыытааччылар куоластарын устуута баар. Соторутааҕыта үтүөлээх оператор Вячеслав Бычковскай түмэл пуондатыгар урукку французскай киинэ камераларын бэлэхтээбитэ.
“Биһиги түмэлбит сүрүн баайа – дьон, кинилэр дьылҕалара. Саха сирин үгүс суруйааччылара араадьыйаҕа үлэлээн ааспыттара. Элбэх киһи ыытааччылары билэр, ол эрээри звукорежиссердар, уоту-күөһү оҥорор техниктэр онтон да атын үлэһиттэр дьылҕаларын билбэт буолуохтаахтар. Кинилэрэ суох эфир табыллыбат этэ, билигин да оннук.
Ол иһин кинилэргэ аналлаах туспа истиэндэ оҥоруохпун наһаа баҕарабын”, – диэн түмэл дириэктэрэ Николай Петров эттэ.
“Саха” НКИХ түмэлэ аныгы кэм сиэринэн сайдан иһэр. Алтынньы 8 күнүгэр виртуальнай экспозициялаах истиэндэни оҥорор былааннаахтар. Маныаха олус элбэх матырыйааллары “сыыппараҕа” түһэриэхтэрэ. Түмэлгэ киирии хааччахтааҕын иһин, Николай Петров туспа сайт оҥорор баҕа санаалаах, өрөспүүбүлүкэ хас биирдии олохтооҕо Саха сирин араадьыйатын уонна тэлэбиидьэнньэтин историятын билиэ-көрүө этэ диэн санаатын үллэстэр.
