«Саха» НКИХ араадьыйата истээччилэригэр анаан үгүс саҥаны бэлэмниир

“Саха” национальнай көрдөрөр-иһитиннэрэр хампаанньа “Тэтим” араадьыйатын олохтоох бириэмэнэн 23.00 чааска диэри ыытар буолуохтара. Ону таһынан араадьыйа саҥа сезонугар тэрээһиннэртэн, түбэлтэ буолбут сирдэриттэн быһа холбонуулар баар буолуохтара.

“Ыытааччылар устуудьуйаҕа сарсыарда 7 чаастан киэһэ 23.00 чааска диэри баар буолуохтара, аҥаардас ырыа эрэ тыаһыа суоҕа. Ол эрээри муусука да эфиргэ хаалыаҕа, ону үс бөлөххө: ретро, 1990-с сыллар уонна аныгы ырыалар диэн арааран холбуохтара. Сарсыарда 7 чаастан 10 чааска диэри иһитиннэрэр, политическай хайысхалаах биэриилэри ыытыахтара, оттон аралдьытар, үөрэтэр чааһын этэр буоллахха, араадьыйа эфиригэр литературнай ааҕыы киириэҕэ”, – диэн “Тэтим” араадьыйа дириэктэрин солбуйааччыта Николай Бястинов кэпсээтэ.

Маны таһынан, саҥа сезоҥҥа “Тэтим Радио” диэн босхо мобильнай сыһыарыы тахсыаҕа.

“Эфиргэ элбэх авторскай биэриилэр, араас тиэмэлээх рубрикалар, ону таһынан истээччилэрбитигэр иһитиннэриини түргэнник уонна кырдьыктаахтык тиэрдээри, түбэлтэ, тэрээһин буола турар сириттэн төлөпүөнүнэн быһа холбонуулар баар буолуохтара”, – диэн Николай Бястинов эттэ.

This post was published on 30.08.2019 11:18 11:18