Ол тэрээһиннэртэн биирдэстэрэ бэҕэһээ, от ыйын 9 күнүгэр, «Сахафильм» судаарыстыбаннай национальнай хампаанньа киинэ көрөр саалатыгар буолла — саха милииссийэтин 100 сылыгар аналлаах документальнай киинэни уонна кинигэни сүрэхтээтилэр.
Манна ис дьыала миниистирэ Владимир Прокопенко уонна ИДьМ управлениеларын салайааччылара, ис дьыала бэтэрээннэрэ, Уопсастыбаннай сэбиэт чилиэннэрэ итиэннэ киинэни, кинигэни оҥорбут дьон кытынна.
«Сахафильм» хампаанньа балтараа ый иһигэр устубут «100 лет на страже земли Олонхо» диэн ааттаах документальнай киинэтигэр саха милииссийэтин-полициятын үйэлээх историята — тэриллиэҕиттэн бүгүҥҥү күҥҥэ диэри — барыта көрдөрүллүбүт.
Режиссер Сардаана Григорьева бу киинэни устаары, ис дьыала уорганнарын үлэтэ хайдахтаах курдук ыараханын өйдөөбүтүн, киинэҕэ архыып матырыйаалларын хото туһаммыттарын, полицейскайдар эппиэтинэстээх үлэлэрин дьэҥкэтик тиэрдэргэ кыһаллыбыттарын бэлиэтээтэ. Киинэни көрөн бүтэн баран, саалаҕа олорооччулар ытыс тыаһынан махтаннылар.
Киинэни уонна «Стражи правопорядка Якутии. История и современность» диэн ааттаах сиэдэрэй, астык оҥоһуулаах, баай ис хоһоонноох кинигэни оҥорууга кыттыбыт дьоҥҥо Ис дьыала министиэристибэтэ бу документальнай киинэ угуллубут үбүлүөйдээх кинигэтин бэлэх уунна.
Кинигэни бэлэмнээбит, таһаарбыт Эдуард Пономарёв иһитиннэрбитинэн, икки ый устата Ис дьыала министиэристибэтин дьиэтигэр олорон, ис сүрэҕиттэн кыһаллан, хас биирдии матырыйаалга сүрэҕин-дууһатын ууран үлэлээбит.
Кинигэ 2500 ахсаанынан бэчээттэммит, онтон 100 устуукатын Национальнай библиотекаҕа туттараллар.
Саха милииссийэтин үбүлүөйүгэр анаммыт киинэни бүгүн, от ыйын 10 күнүгэр, киэһэ 18:15 уонна 22:00 чаастарга «Якутия24» телеханаалга, ол кэнниттэн нэдиэлэ устатыгар көрүөххүтүн сөп.
Биһиги корр., «Саха сирэ» хаһыат, edersaas.ru
Хаартыскалар: СӨ ИДьМ-тын пресс-сулууспата.
