«Тыл кыһата» айар холбоһук уонна «Сахамедиа» холдинг, Саха иһитиннэрэр агентствота (СИА) тэрийбит өрөспүүбүлүкэтээҕи «Саха хоһооно-2016» күрэхтэрэ түмүктэннэ, кыайыылаахтар ааттаннылар.
«Бачча элбэх үлэ киириэ диэн бэйэбит да сабаҕалаабатахпыт. Ити эрээри интернет ситиминэн хоһоон кутулла турда, үс саастаах кырачаантан саҕалаан 93 саастаах аарыма кырдьаҕаска тиийэ хоһоону доргуччу аахтылар», — диэн кэпсииллэр тэрийээччилэр.
Поэзия түһүлгэтин кыттааччылара норуот таптааллаах поэттарын айымньыларын кэрэхсииллэр. Алампа, Ойуунускай, Семен Данилов, Күннүк Уурастыырап уо.д.а. суруйааччылар хоһооннорун аахтылар.
Маннык куонкурус аан бастаан иллэрээ сыл тэриллибитэ уонна быйыл сөргүтэн ыытылынна. Онуоха ааспыт Литература сыла уонна кыайыы өрөгөйдөөх үбүлүөйэ дьон-сэргэ санаатыгар үтүө өйдөбүлү хаалларбыта чуо биллэр. Үгүс кыттааччы хоһоонун албан ааттаах көлүөнэҕэ анаабыт.
Быйыл уопсайа 500-чэкэ видеоролик киирбититтэн жюри бастыҥнарын талла. Өрөспүүбүлүкэ араас улуустарыттан, куораттарыттан, ону таһынан дойду атын регионнарыттан, оннооҕор кыраныысса таһыттан кытыннылар.
Дьүүллүүр сүбэ састаабыгар идэтийбит артыыстар уонна биллиилээх суруйааччылар киирдилэр. Кинилэр хас да күнү быһа хас биирдии видеоролигы көрөн баран, бастыҥнары таллылар.
Сахалыы тыллаах кыттааччылар ортолоругар 1 миэстэни Томпо улууһун Мэҥэ-Алданыттан Галина Никифорова салайааччылаах «Одун» бөлөх ылла.
Иккис миэстэҕэ Ньурба улууһун Сүлэтиттэн Маргарита Николаева, оттон үһүскэ — Уус Алдантан Василий Бурнашев таҕыстылар.
Атын тыллаах кыттааччылар ортолоругар Нерюнгриттан 17 саастаах Роман Макаров, култуура уонна искусство колледжын устудьуона, бастаата.
Иккис миэстэни Табаҕа оскуолатын үөрэнээччилэрэ Илья Бецанич уонна Александр Сильвестрович (10 саастаахтар), үсүһү — Бүлүүтээҕи оҕо дьиэтин иитиллээччитэ Александр Галямов ыллылар.
