СӨ бастакы бэрэсидьиэнэ М.Е.Николаев ыйааҕынан 1999 с. муус устар бастакы өрөбүлүгэр Аҕа күнэ бэлиэтэнэр. 2017 с. муус устар иккис өрөбүлүгэр Ил Дархан Е.А.Борисов ыйааҕынан Уол күнэ бэлиэтэнэр буолбута.
Бу күннэргэ Дьокуускай куорат оскуолаларыгар тэрээһиннэр өрө көтөҕүллэн олус көхтөөхтүк ыытылыннылар. Муус устар 7 күнүгэр Саха гимназиятыгар Аҕа уонна Уол күнүгэр аналлаах бэрт сэргэх тэрээһиннэр буолбуттарын туһунан гимназия пресс-кииниттэн Надежда Жерготова иһитиннэрдэ.
—Бастакы күн тэриллибит “Хаар” диэн ааттаах аахсыйаҕа 60 аҕа кэлэн көхтөөхтүк кытынна. Кинилэр итинэн оҕолорго үтүө холобур буоллулар. Аҕалар уолаттарын кытары оскуола таһынааҕы хаары күттүлэр, тиэргэни ыраастаатылар. Үлэ-хамнас биир тыынынан үөрэ-көтө барда. Уолаттар үөрэнэр кыһаларын таһын ыраастаабыттарыттан улаханнык астыннылар, үөрдүлэр.
Долгутуулаах, үөрүүлээх тэрээһиҥҥэ кыттыбыт аҕалар уонна уолаттар гимназия тиэргэнигэр турар Улуу Кыайыы 70 сылыгар ананан оҥоһуллубут, бүтүн өрөспүүбүлүкэ үрдүнэн соҕотох “Аҕа уонна уол” диэн стела таһыгар хаартыскаҕа түстүлэр. Ол кэннэ “Тыллыы” уус-уран ааҕыы бырайыагын уолаттара Ийэ дойдуга аналлаах композицияларын көрдөрдүлэр. Бу туруоруу тэрээһин дириҥ ис суолталааҕын арыйда, барыбытын долгутта.
Саха гимназиятын Управляющай сэбиэтин бэрэссэдээтэлэ А.А.Семенов, Аҕа сүбэтин чилиэнэ, “Лига отцов” бэрэссэдээтэлин солбуйааччы Я.Т.Оконешников, “Саха кэскилэ” оҕо тэрилтэтин салайар С.О.Ноев Аҕа уонна Уол күнэ саҥа саҕахтары арыйар дириҥ ис хоһоонноохторун, бу өбүгэлэрбит үтүө үгэстэригэр, сатабылларыгар үөрэтэргэ, уһуйарга, кэнчээри ыччакка иҥэрэргэ далаһа буолалларын бэлиэтээтилэр. Эстрада эдэр ырыаһыта Кэскил Баишев “Дойдум салгына тыынна биэр” диэн муусуканан эҕэрдэтэ төрөппүттэр этиилэрин, баҕа санааларын өссө ситэрэн-хоторон, бигэргэтэн биэрдэ. Үөрүүлээх күн өрөгөй оһуохайынан түмүктэннэ, — диэн кэпсээтэ.
Бу бэлиэ күн аҕалар уонна уолаттар көхтөөх кыттыылара гимназия кэлэктиибин улаханнык үөрдүбүт, долгуппут.
edersaas.ru
