Дойду регионнарыгар баар Саха сирин бастайааннай бэрэстэбиитэлистибэлэрэ Уһук Илиҥҥэ гектар сири босхо ыларга сүбэнэн-аманан көмөлөһүөхтэрэ. Ити туһунан тас сибээс миниистирэ Владимир Васильев эттэ.
Санатар буоллахха, алтынньы 1 күнүттэн күүһүгэр киирбит федеральнай сокуон быһыытынан Уһук Илин дьоно-сэргэтэ олорор сирдэринэн, оттон олунньу 1 күнүттэн Уһук Илин бары регионнарыгар сири босхо ылар бырааптаахтар.
«Биһиги сабаҕалыырбытынан, дьон Амур, Хабаровскай уобаластарыгар, Приморскай кыраайга сир ылар баҕалаах буолуохтарын сөп. Ол иһин ити регионнарга баар бастайааннай бэрэстэбиитэлистибэлэрбит көмө-тирэх буолалларын туһунан кэпсэттибит», —диэтэ Владимир Васильев.
Миниистир этэринэн, бэрэстэбиитэлистибэ үлэһиттэрэ чопчу ыйыллыбыт сиргэ тиийэн бу сир төһө табыгастааҕын көрүөхтэрэ-истиэхтэрэ. Ону таһынан Уһук Илиҥҥэ үөрэнэ сылдьар устудьуоннартан турар волонтердары, саха диаспоратын маныаха түмэ тардыахтара.
«Бырайыак тэтимнээхтик барарыгар бу сүрүн төһүү буолуоҕа», — диэтэ Васильев.
