Саха сирин бааһынай хаһаайыстыбаларын баһылыктара Тверь уобалаһын хаһаайыстыбалара хайдах үлэлииллэрин көрө-истэ, уопут атастаһа бардылар. Кинилэр истэригэр улуустардааҕы ассоциациялар уонна тыа хаһаайыстыбатын кэпэрэтииптэрин салайааччылара бааллар. Барыта 35 киһилээх улахан дэлэгээссийэни АККОР бэрэсидьиэнэ, “Туймаада” хампаанньа генеральнай дириэктэрин солбуйааччы Александр Артемьев баһылаан-көһүлээн илдьэ сылдьар.
Кинилэр Москваттан Тверьгэ сарсын, кулун тутар 12 күнүгэр, айаннаан тиийиэхтэрэ уонна күнүскү чэйтэн киэһэ “Калининское” сабыылаах акциялаах уопсастыба сүөһү иитэр комплексыгар сылдьан, исписэлиистэри көрсөн кэпсэтиэхтэрэ. Бу хаһаайыстыба үүт хайысхалаах. Биир ынахтан сылга ортотунан 10 туонна 300 киилэни ыыллар. Маны ынах сүөһүнү аһатыыга, ыаһыҥҥа уонна иитиигэ саҥа технологияны киллэрэн ситиспиттэр. Племенной ыччат сүөһүнү төлөһүтэн, атыыга таһаараллар. Былырыын баччаттан бэйэлэрэ үүттэн иэдьэгэй, йогурт, ряженка, чөчөгөй, аһытыллыбыт сүөгэй астыыр буолбуттар.
Саха бааһынайдара иккис күннэригэр биир идэлээхтэригэр – “Завидовское” бааһынай хаһаайыстыбаҕа ыалдьыттыахтара. Фермер хаһаайыстыбата Конаковскай оройуоҥҥа Бушмино дэриэбинэҕэ 8-с сылын ынах сүөһүнү, козаны, көтөрү иитиинэн дьарыктанар. Сүөһү, көтөр аһылыгын бэйэлэрэ оҥорор сыахтаахтар. Эттэн халбаһы, полуфабрикат уонна үүттэн, ол иһигэр сыр 15 көрүҥүн, астыыллар, сыр харайар 2 хранилищелаахтар. Хаһаайыстыба агротуризм хайысхатынан эмиэ сайдар. “Завидовское” – “Тверь аграрнай үөрэҕин кластера” бырайыак кыттыылааҕа.
Ыалдьыттар мантан салгыы Госдуума дьокутаата, дойду АККОР-ун бэрэсидьиэнин солбуйааччы С.В.Максимовалыын уонна “Мермерины” кыыл иитэр хаһаайыстыбаҕа сылдьан, хаһаайыстыба дириэктэрин – Россия кыыл иитээччилэрин ассоциациятын бэрэссэдээтэлин кытта көрсөр былааннаахтар. “Мермерины” хаһаайыстыба племенной собуот быһыытынан үлэлиир, кыыл тириитин бэйэтэ таҥастыыр, түүлээх таҥаһы тигэр сыахтаах уонна бэлэм бородууксуйаны атыылыыр маҕаһыыннаах.
Дэлэгээссийэ Тверь уобалаһын фермердэрин көрсөн ирэ-хоро кэпсэтэн баран, бүтэһик үһүс күҥҥэ А.В.Тропин бааһынай хаһаайыстыбатыгар ыалдьыттыаҕа уонна төттөрү айаҥҥа турунуоҕа. Манна сыһыаран эттэххэ, Москваҕа эрдэ тиийбиттэр бүгүн иллэҥ кэмнэрин туһалаахтык атаара сылдьаллар. Ол курдук, күнүс Москва уобалаһын Дмитрово оройуонугар Горки дэриэбинэҕэ баар “Свободный труд” бааһынай хаһаайыстыбалаах Рамиль Булатовка ыалдьыттаан баран, онтон салгыы Одинцово оройуон Ершово сэлиэнньэтигэр Ольга Ивлева экоферматын көрө бардылар. Киэһэ Домодедовоҕа фермер Александр Черкасов “Вершки и корешки” хаһаайыстыбатыгар тиийиэхтэрэ.
Хаартыскаларга: “Көҥүл үлэлээх” фермер Рамиль Булатов Саха сирин бааһынайдарыгар уобалас губернатора дьиэ кэргэн сүөһү иитэр фермаларын сайыннарар бырагырааматын көмөтүнэн туттубут базатын көрдөрөр.
This post was published on 12.03.2018 10:30 10:30