Бу бэлиэ түгэҥҥэ анаммыт тус сыаллаах соруктартан Саха сирин олохтоохторун ахсаанын 1 мөл киһиэхэ тиэрдиини испииһэктэн таһаардылар. Ол оннугар чопчу соруктары туруорарга этилиннэ. Маннык соругу өрөспүүбүлүкэ үбүлүөйүгэр бэлэмнэниигэ анаммыт мунньахха ылыннылар.
Экэниэмикэ министиэристибэтин этии киллэриитинэн үбүлүөйү бырааһынньыктааһын туһунан ыйаахха ыйыллыбыт сүрүн көрдөрүүлэри хаттаан көрөргө этилиннэ.
Миниистир Майя Данилова нэһилиэнньэ ахсаана эбиллиитин көрдөрүүлэрин хаттаан көрөргө эттэ.
“Саха сирин нэһилиэнньэтин ахсаанын 1 мөл киһиэхэ тиэрдиини ситиһии дьиҥэ суох. Итиниэхэ биричиинэнэн олохтоммут тус сыаллаах индикатор уонна көһөн барыы буолар. 2014-2018 сылларга өрөспүүбүлүкэттэн 20 тыһыынча киһи барда”, — диэтэ кини.
Владимир Путин “ыам ыйынааҕы” ыйаахтарын учуоттаан, Данилова саҥа соруктары туруорарга эттэ: 2022 сылга киһи олоҕун уһунун 76,8 сааска тиэрдии уонна сырьета суох салааларга 10 тыһыынча үлэ миэстэтин тэрийэргэ.
Саха сирин Ил Дархана Айсен Николаев бу этиилэри дьиҥ балаһыанньаҕа олоҕурар наада диэн өйөөтө.
“Нэһилиэнньэ ахсаанын 1 мөл киһиэхэ тиэрдиини ситиһэр соругу устар сөп. Демографияҕа сабыдыалыыр олус уустук. Киһи үйэтин уһатыыны уонна сырьета суох салааларга 10 тыһыынча үлэ миэстэтин тэрийини кыайар кыахтаахпыт. Маннык соругу туруоран, толоруохха”, — диэн экэниэмикэ министиэристибэтин этиитин Ил Дархан өйөөтө.
This post was published on 26.10.2018 16:50 16:50