Бүгүн Араадьыйа үлэһиттэрэ идэлээх бырааһынньыктарын бэлиэтээтилэр. «Саха» НКИХ араадьыйатын үлэһиттрэ бу күнү олус күндүтүк санаан бэлиэтииллэр.
Кэргэннии Гоголевтар Саха араадьыйатыгар үлэлээбиттэрэ отуттан тахса сыл буолла.
Аэлита Гоголева Саха араадьыйатыгар 1996 сыллаахха үлэлии кэлбитэ. 17 сыл араадьыйаҕа, быйыл 6-с сылын хампаанньа тэрийэр салаатыгар үлэлиир. Сүрүннээн салайар үлэҕэ сылдьар киһи бэлиэтииринэн, сүүрбэттэн тахса сыл устата араадьыйа үлэтэ олус тэтимнээхтик сайынна.
— Мин Дмитрий Избектовтаах үлэлиир кэмнэрин баттаспытым. Оччолорго ити кэм «Сэбиэскэй Сойуус классическай араадьыйата» диэн эпоха буоллаҕа. Ол саҕана Саха сирин киэн туттар диктордара Виктория Максимова, Афанасий Готовцев үлэлэрин үгэнэ этэ. Билиҥҥи кэм араадьыйата уруккуттан тосту уларыйда. Ол эбэтэр сэбиэскэй кэмҥэ араадьыйа «Диктор араадьыйата» дэнэр эбит буоллаҕына, билигин олох атын аныгы хайысха өтөн киирдэ. Ол эбэтэр биэрии үксэ быһа эфиринэн барар. Араадьыйа техническэй өттүнэн муҥутуурдук сайынна. Урут сарсыардаттан күнүс икки чааска эрэ диэри эфир барар эбит буоллаҕына, быйыл от ыйыттан 17 чаас «иһиллээри» олоробут. Ол аата Саха сирин олохтоохторо аны араадьыйаны тохтобула суох истэр буолуохтара.
Олус талааннаах аныгы көлүөнэ суруналыыстар кэллилэр. Ол эбэтэр ыччаттар билигин хантан баҕарар буола турар тэрээһинтэн быһа эфири тута ыытар кыахтаахтар, — диэн бэлиэтиир Аэлита Гоголева.
Оттон Борис Гоголевы билбэт Саха араадьыйатын истээччитэ, бука, суоҕа буолуо. Кини араадьыйаҕа «Дабаан» ааптарскай биэриитин олус да сөбүлээн истэрбит.
— Ааптарскай биэриини ыытарбын олус суохтуубун, — диэн бэлиэтиир Борис Трофимович. Суруналыыс билигин сонуннары биэрэр. Уопуттаах киһи диэх курдук, кини бэлэмниир сонуннара, урукку кэмнээҕэр төһө да бириэмэ кылгаһын үрдүнэн, өрүү дириҥ ис хоһоонноох, киһи болҕомтотун тардар. Айар куттаах буолан, «ырыа» диэн баран муннукка ытаабыт киһи.
— «Саха» НКИХ иһинэн эр дьон ансаамбылын тэриммиппит. Онон бу бөлөхпүтүнэн араас тэрээһиннэргэ, гастролларга кыттабыт, — диэн кэпсии турдаҕына, сэһэргэһээччибин: «Борис, кэл, ыллаан эрэбит», — диэн ыҥыран ыллылар. Кыл түгэнин иһигэр кэпсэтэ турбут киһим, аны сүүрэн тиийэн «Славянка быраһайдаһыыта» диэн ырыаны кэллиэгэлэрин кытта тардан кэбистэ…
Василий Посельскай Саха араадьыйатыгар 1998 сылтан спортивнай биэрии редакторынан үлэлиир.
— «Саха» НКИХ үлэһиттэрэ Сэбиэскэй Сойуус Дьоруойа Николай Кондаков аатынан сквер тутулуоҕуттан ыла үөрүүлээх тэрээһиннэрбитин сыл аайы манна бэлиэтиибит. Онон Күөх Маай бэлиэ бырааһынньыктара мантан саҕаланаллар. Идэбинэн история учууталабын эрээри, биир-икки эрэ сыл үлэлээбитим. Суруналыыс идэбин наһаа сөбүлүүбүн, туохха да биэрбэппин! Спорт кыайыылаахтарын сырдатыым — дьылҕам бэлэҕэ, — диир спортивнай суруналыыс Баһылай Посельскай.
Саха араадьыйатын быһа эфирдэрин ыытар биир тарбахха баттанар, уопуттаах режиссера Юрий Чекуров үлэтигэр эмиэ олус бэриниилээх үтүөкэннээх киһи.
— Араадьыйабыт олус сайынна. Билигин телевидениены кытта «синтез» биэриилэри ыытар буоллубут. Онон дьон саха араадьыйатыгар буола турар биэриини холбуу телевидениеҕэ көрөллөр. Бу наһаа үчүгэй сонун сүүрээн, — диэн санаатын үллэстэр Саха араадьыйатыгар 27-с сылын үлэлиир Юрий Чекуров. Дьиҥинэн кини театральнай режиссер үөрэҕин бүтэрбит эбит. Биир үтүө күн Юрий үөрэҕин бүтэрээт, бииргэ үөрэммит табаарыһа Эдуард Рудыхтыын Гостелерадиоҕа үлэ кэпсэтэ киирэн баран, иккиэн тутуспутунан ол күнтэн ыла отучча сыл бииргэ үлэлии сылдьаллар.
Ити курдук, Саха араадьыйатын чаҕылхай «сулустара» күн бүгүн тапталлаах идэлэринэн үөрэ-көтө саҥаны, үйэлээҕи уһансан, төрөөбүт Сахаларын сирин социальнай-экэнэмиичэскэй сайдыытыгар дьоһуннаах кылааттарын киллэрэ сылдьаллар.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.
