Сааскылаахха фонтан туруордулар. Бу күнтэн саҕалаан аҕыйах ахсааннаах омуктар норуоттар икки ардыларынааҕы күннэрин бэлиэтиир нэдиэлэ ыытыллар.
Андросов аатынан сквергэ былаас бэрэстэбиитэллэрэ, олохтоохтор хото муһуннулар. Кнопканы баттаан, фонтаны аан бастаан үлэлэтэр үрдүк чиэс үс саастаах Ева Спиридоноваҕа тосхойдо.
Эбии үөрэхтээһин дириэктэрэ Наталья Болхоева тутааччыларга махтанна уонна фонтан атта дьон-сэргэ сөбүлээн сылдьар сирэ буоларыгар баҕарда.
Фонтаны архитектор Владимир Андросов уонна Геннадий Спиридонов Сааскылаах нэһилиэгин сакааһынан оҥордулар. Фонтан саха иһитин – кытыйаны санатар быһыылаах, ортотугар сардаана сибэккиттэн уу сүүрүгүрэр.
2016 сыл нэһилинньэлээх пууннары тупсарыы сылынан биллэриллибитэ. Манна уопсайа 2,3 млрд.солк. кээмэйдээх үп-харчы көрүллүбүтэ.
Урукку сыллары кытта тэҥнээтэххэ, көҕөрдүү үлэтэ уон төгүл улааппыт. 68,6 тыһ. маһы 34,4 тыһыынча талаҕы олордубуттар. Сибэкки үүннэриитэ икки бүк эбиллибит.
Суоллары өрөмүөннүүллэр, куораттарга уонна бөһүөлэктэргэ спорт, оҕо площадкаларын тутуу үс бүк элбээбит.
