Амма улууһугар быйылгы сылга 3425 гектарга туораахтаах култуураны ыһыахтара. Сааскы ыһыыга бэлэмнэнэнии өссө ааспыт сыл күһүнүттэн саҕаламмыта.
Аммаҕа бурдук үүннэрэр хаһаайыстыбалар уопсайа 2949 гектар сиргэ паардааһыны ыттылар. Бу күннэргэ улуус кылаабынай агронома Николай Гаврильев “Соморсун”, “Бөтүҥ” бурдук ыһар хаһаайыстыбаларга сырытта. Бэлэмнэнии хайдах баран иһэрин, туох кыһалҕа баарын билистэ.
“Хаһаайыстыбалар күүстээхтик бэлэмнэнэ сылдьаллар. Сиэмэ бурдук, уматык харчыта барыта кэлэн турар. Билигин техникаларын өрөмүөннүүллэр. Онно саппаас чаас тиийбэт. Ол да буоллар ыһыыны кэмигэр ыытыахпыт диэн былаанныыбыт. Бааһыналар ыам ыйын 12 күнүгэр ардах-хаар мэһэйдээбэтэҕинэ сүрүннээн кууруохтара. Оччоҕо ыһыыны саҕалыахпыт. Күн бүгүн уопсайа 581 тонна сиэмэ бурдук, минеральнай уоҕурдуу кэлбитэ”, — диэн Николай Степанович этэр.
