Саахыматчыт Руслан Пахомов чөмпүйүөн лиэнтэтин кэттэ

0
74
чөмпүйүөн Руслан Пахомов

Аҕыйах сылтан бэттэх саахыматы таптааччылар аан дойдутааҕы ассоциациялара бэйэлэрин чөмпүйэнээттэрин кыайа-хото ыытар буолла.


ФИДЕ киэниттэн уратыта диэн, бу түһүлгэҕэ 2300-кэ диэри ЭЛО рейтиннээх, идэтийэн (профессионаллар) туран дьарыктаммат саахыматчыттар эрэ кыттар бырааптаахтар. Ол эбэтэр, үрдүк кылаастаах аан дойдутааҕы гроссмейстердар уонна маастардар кыттыбаттар. Ол да буоллар, саахыматы таптааччылар чөмпүйэнээттэрэ сыллата элбэх кыттааччыны түмэр, интэриэһи тардар.

Бу күннэргэ Италия Умбрия провинциятын Сполето куоратыгар ыытыллыбыт чөмпүйэнээт 40 араас дойдуттан 80 саахыматчыты түмтэ. Ити иһигэр Россияттан уонтан тахсалар. Саха сириттэн Хотугулуу-Илиҥҥи федеральнай университет устудьуоннара, маастарга хандьыдааттар Руслан Пахомов, Туйаара Адамовауонна Вилена Попова олус ситиһиилээхтик кыттыбыттарын бэлиэтиибит.

Руслан Пахомов эр дьоҥҥо (66 киһи) маҥнай утаа “чаҕылҕанныы оонньооһуҥҥа” (блиц) 9-тан 7,5 очукуону ылан, кыайыылаах таҕыста уонна чөмпүйүөн лиэнтэтин кэттэ. Уонча маастар кыттыбытын учуоттаатахха, эдэр киһиэхэ бу улахан ситиһии. Салгыы классическай саахымакка Руслан эмиэ ситиһиилэннэ: 9 партия оонньоон 6,5 очукуоланна уонна үһүс бириистээх миэстэҕэ тигистэ. Ити түмүгэр Руслан Пахомов ЭЛО рейтинин 26 пуун эптэ уонна, уопсайа, 2284 пууҥҥа тиэртэ. Аны өссө 14-15 пууну эбиннэҕинэ, кини маастар аатын ылыахтаах. Сунтаар Аллаҥатыттан төрүттээх устудьуон уолу мин Саха сирин биир кэскиллээх саахыматчытынан ааҕабын.

Нам кыыһа Вилена Попова дьахталларга (14 кыттааччы) чаҕылхай оонньууну көрдөрдө: 7,5 очукуону хомуйан чөмпүйүөн аатын ылла. Вилена – саахыматчыт Поповтар сыдьааннара. Аҕата Платон Михайлович, абаҕата Максим Михайлович өрөспүүбүлүкэ биллэр-көстөр саахыматчыттара.

Маастарга хандьыдаат Туйаара Адамова бу сырыыга эр дьон ортотугар кытынна уонна сорох партияларын үрдүк таһымҥа оонньоото.

 

0
0

Хоруй суох

Хоруйдаа