Бу күннэргэ Дьокуускайга “Саҕалааччы фермер» оонньуу эрэгийиэннээҕи түһүмэҕэ буолан ааста. Тэрээһин Саха сиригэр үһүс төгүлүн ыытылынна. Саха сирин оҕолоро тыа хаһаайыстыбатыгар бизнес-былаан толкуйдуур дьоҕурдарын сайыннарар оонньууну куһаҕана суохтук аастылар. Ити туһунан Саха Судаарыстыбаннай тыа хаһаайыстыбатын академиятын саайта суруйар.
Оонньууга Амма, Бүлүү, Үөһээ Бүлүү, Эдьигээн, Кэбээйи, Горнай, Мэҥэ Хаҥалас, Нам, Таатта, Уус Алдан, Уус Маайа, Чурапчы, Өлүөхүмэ, Ньурба, Сунтаар, Томпо улуустарыттан уонна Дьокуускай куораттан барыта 54 оҕо кытынна.
Кыттааччылар оонньууну сэҥээрдилэр. Саха Судаарыстыбаннай тыа хаһаайыстыбатын академията ыытар “Чугунов агроааҕылара” научнай-практическай кэмпириэнсийэ кыайыылааҕа Маша Кириллова Тулуна кыайыылаах хамаандатыгар киирэн кытынна. Кини быйыл оскуоланы бүтэрээри сыльар, салгыы академияҕа киирэр санаалаах. Маша хамаандата Москваҕа быйыл буолар “Саҕалааччы фермер” интеллектуальнай оонньуу Арассыыйатааҕы түһүмэҕэр Саха сирин аатын көмүскүөҕэ.
II истиэпэннээх дипломунан С.Р.Кулачиков аатынан орто оскуола (Таатта) хамаандата ылла. III истиэпэннээх диплому Ороссолуода оскуолатын (Мэҥэ Хаҥалас улууһа) хамаандата тутта.
Итини таһынан “Бастыҥ оонньуу иһин” номинацияҕа Өлүөхүмэ улууһун Токко орто оскуолатын үөрэнээччитэ Сахаайа Чердонова, Томпо улууһун Мэҥэ Алдан орто оскуолатын үөрэнээччитэ Варвара Степанова СӨ тыа хаһаайыстыбатын уонна аска-үөлгэ бэлиитикэтин миниистирэ Петр Алексеев анал бирииһинэн бэлиэтэннилэр.
Оттон “Саҥа үйэ бастыҥ бырайыага” номинацияҕа Күндээдэ орто оскуолата (Сунтаар) бастаан, Дьокуускайга “Бэс Чагда” кииҥҥэ 3 путевканы ылла. “Бастыҥ бизнес-былаан” номинацияҕа кыайыылааҕынан С.С.Сюльскай аатынан орто оскуола (Ньурба) хамаандата тахсан, көмпүүтэр тиэхиньикэтин (оргтехника) ыларга сэртипикээти тутта. Дьокуускайдааҕы тыа хаһаайыстыбатын техникумун анал бирииһинэн – көмпүүтэр тиэхиньикэтэ (оргтехника) сэртипикээтинэн Тулагы (Дьокуускай) орто оскуолата бэлиэтэннэ.
“Бастыҥ хамандыыр” номинацияҕа Иван Попов (Ороссолуода, Мэҥэ Хаҥалас), “Животноводстваҕа бастыҥ бырайыак” номинацияҕа (Төлөй, Чурапчы), “Саамай кырачаан кыттааччы” номинацияҕа Туйаара Протопопова (2 Хомустаах, Нам), “Сылгыны иитии хайысхаҕа бастыҥ бизнес-бырайыактаах кыттааччы” номинацияҕа Герман Назаров (Бөтүҥ, Амма) тигистилэр. “Бастыҥ быыстапка” номинацияҕа дипломунан Эдьигээн орто оскуолатын кэлэктиибэ наҕараадаланна.
