Алтынньыттан ыла «Саҥа ырыа» интерактивнай телевизионнай куонкурус саҕаланар. Быйылгы бырайыагы «Саха» НИКК уонна эстрада тыйаатыра тэрийэллэр.
«Саҥа ырыа» тутула уруккутунан хаалар. Саҥа саҕалааччылар да, биллэр-көстөр да артыыстар биир үктэлгэ тутуллан сыаналаныахтара. Быйыл сахалыы эрэ ырыалар ылланыахтара», — диэн СИА-ҕа эстрада тыйаатырын продюсера Пётр Пестряков эттэ.
Жюри састаабын тэрийээччилэр билиҥҥитэ эппэттэр.
Талар түһүмэҕи ааспыттар куоластааһыҥҥа киирэллэр. Кинилэр тустарыгар ыалдьааччылар тохсунньуттан олунньуга диэри СМС ыытан куоластыахтара.
Түмүккэ икки кыайыылааҕы быһаарыахтара. Биир кыайыылааҕы — көрөөччүлэр, атыны — идэтийбит жюри. Жюри талбыт кыттааччыта үбүнэн-харчынан бириэмийэлэнэр.
«Саҥа ырыа» 11 сезонугар талар түһүмэх алтынньы 22-23 күннэригэр ыытыллар. 17-21 чыыһылаларга сайаапкалары Дежнёв аатынан уулусса, 26 А киллэриэхтээхтэр.
«Саҥа ырыа» — өрөспүүбүлүкэтээҕи интерактивнай музыкальнай телевизионнай конкурус 2004 сылтан ыла ыытыллар. Үбүлүөйдээх 10-с сезон 2014 сыл ыам ыйыгар ыытыллыбыта.
