2011 сылтан үс уонна онтон элбэх оҕону биир күн төрөппүт ыалга дьиэ ылыналларыгар бырабыыталыстыба төлөбүр оҥорор. Бу күҥҥэ диэри оннук дьаһалынан 11 ыал туһанна.
Үс уонна онтон элбэх оҕону биир күн төрөппүт ыал олорор дьиэлэрин усулуобуйаларын тупсаралларыгар социальнай төлөбүрү оҥоруу быраабылатын бырабыыталыстыба 2010 сыллаахха ыам ыйын 3 күнүгэр ылыммыта.
«Үс уонна онтон элбэх оҕону биир күн төрөппүт ыалга төлөбүрү оҥоруу туһунан быһаарыыны Үлэ министиэристибэтин иһинэн баар хамыыһыйа таһаарар. Ол кэннэ бырабыыталыстыба өрөспүүбүлүкэ саппаас фондатыттан төлөнөрүн туһанан дьаһал ылынар«, — диэн регионнааҕы үлэ уонна социальнай сайдыы миниистирэ Елена Волкова эттэ.
Социальнай төлөбүр кээмэйэ дьиэ кэргэн ахсааныттан, дьиэ уопсай иэниттэн, Тутуу министиэристибэтэ бигэргэппит биир квадрат сыанатыттан тутулуктаах.
