Бэҕэһээ, балаҕан ыйын 28 күнүгэр сүппүт Дьокуускай куорат 16-с №-дээх оскуолатын үөрэнээччитэ Настя Л. чаас аннараа өттүгэр көһүннэ. Полицияҕа эппиттэринэн, кыыс дьүөгэтин кытта «Туймаада» атыы киинигэр сылдьаллара. Дьүөгэтэ Лена Е. эмиэ сүтэрбиттэрэ, көрдүүллэрэ.
СИА-ҕа Анастасия Л. аймаҕа этэринэн, кыыс үһүс күнүн үөрэммэтэх. Бу устата дьүөгэтинэн күлэйдии сылдьыбыт, ол эрээри дьиэтигэр хоно кэлэрэ үһү.
Настя Үөһээ Дьааҥы улууһуттан 2011 сыллаахха кэлбит. Ийэтэ ити улууска олорор.
«Настя урукку өттүгэр хаһан да сүппэт этэ. Ол эрээри кэлиҥҥи кэмҥэ оскуолаҕа сылдьыбатах. Уруоктарын көтүппэтин туһунан этэ сатыыбыт да, туһата суох. Миигиттэн эппэккэ эрэ 3 тыһ.солк. ылбыт этэ. Кылаабынайа, кыыс тыыннаах, доруобай, дьиэтигэр баар«, — диэн кыыс аймаҕа дьахтар эттэ.
Настя сотору Үөһээ Дьааҥыга ийэтигэр төттөрү барыахтаах.
