Өлөөҥҥө Мирнэй оройуонун күннэрэ доҕордоһуу, бииргэ үлэлээһин үтүө далаһатын уурарга ананан ситиһиилээхтик ыытылыннылар.
Тэрээһин чэрчитинэн М.К. Аммосов аатынан ХИФУ филиала Мирнэйдээҕи политехническай институт устудьуоннара уонна Светлэйдээҕи индустриальнай техникум преподавателлэрэ техническэй идэлэри биэрэр кыһаларын билиһиннэрдилэр. Делегация салайааччыта Илья Якушев, институт электрификацияҕа уонна автоматизацияҕа кафедратын сэбиэдиссэйин солбуйааччы Александр Семенов политехническай институт үөрэтэр хайысхаларын, идэлэрин: «юриспруденция», «прикладная математика и информатика», «филология», «нефтегазовое дело», «Горное дело», «Электроэнергетика и электротехника», «Экономика» оскуола үөрэнээччилэригэр кэпсээтилэр. Маныаха билиҥҥи кэмҥэ саамай хайа дьыалатыгар инженер, сир баайын туһаҕа таһаарыы хайысхаларга абитуреннар хото киирэллэрин эттилэр. Александр Семенов: «Промышленнай тэрилтэлэри кытта дуогабардаһан практикаларын үрдүттэн «АЛРОСА» АК бараллара олус табыгастаах. Сөбүлэҥ быһыытынан устудьуоннар үөрэхтэрин бүтэрдэхтэринэ үлэнэн толору хааччыллаллар. Техническай үөрэхтэргэ толору автоматизация киирэн, кыргыттар эмиэ сөбүлээн үөрэнэллэр«, — диэн кэпсээтэ.
Мирнэйдээҕи политехническай институт 2-с куурсун устудьуона, Эдьигээн кыыһа Виктория Владимирова икки сыллааҕыта Мирнэйтэн Эдьигээҥҥэ техническай идэлэри билиһиннэрэ тиийбиттэригэр истэн баран, хайа дьыалатыгар үөрэнэ киирбит. «Мирнэйгэ үөрэнэр бары өттүнэн табыгастаах, үөрэх хаачыстыбалаах, үлэни үрдүттэн промышленнай хампаанньаларга булуохха сөп«, — диэн кэпсиир кини. Оттон Светлэйдээҕи индустриальнай техникум преподавателэ Туяра Габышева орто үөрэхтээх техническэй рабочайдары бэлэмнээн таһааралларын, бүтэрбит оҕолор 100% үлэ булалларын эттэ. Чугастыы сытар ыаллыы улуус оҕолорун үөрэнэ баралларыгар ыҥырда. Маннык бырагырааманан Кирбэй нэһилиэгин Харыйалаах орто оскуолатыгар эмиэ сырыттылар.
Садын нэһилиэгин баһылыга Иван Игнатьев санаатын маннык үллэһиннэ: «Өлөөн олохтоохторо наһаа үчүгэйдик сылаастык көрсүбүттэригэр махтанабыт. Аймахтыы сыһыаны эппинэн-хааммынан биллим. Музейга сырыттыбыт. Табабыт иитиитин сөргүтүөхпүтүн баҕарабыт. Онон Сүлдьүкээргэ филиал арыйыахха диэн этии оҥордум. Мирнэй оройуонун промышленнай тэрилтэлэрэ биһиэхэ элбэх көмөнү оҥорор. Социальнай объектарбыт «АЛРОСА» хампаанньа көмөтүнэн тутулла тураллар. Дьоммут майгылара майгыннаһар. Онон тугу эрэ кэскиллээҕи бииргэ оҥоруохпут».
