Былырыын Ил Дархан Айсен Николаев «Саха ынаҕа» диэн генофонднай тэрилтэ тэрийэрин туһунан дьаһал таһаарбыта. Тэрилтэ биир салаата Мииринэй улууһун Сүлдьүкээр нэһилиэгэр баар урукку «Новый» совхоз базатыгар олохтоммута. Манна хотон тутан саҕалаабыттарын туһунан СИАҕа Мииринэй оройуонун пресс-сулууспата иһитиннэрэр.
Бу сыл муус устар ыйыгар Сүлдьүкээргэ 147 саха ынаҕын аҕалтара. Саҥа хотоҥҥо 17 тарбыйах төрөөбүт. Экспертэр ынахтар туруктарын үчүгэйинэн сыаналыыллар, онон сүөһү адаптацияны этэҥҥэ ааспыт дииллэр.
Оройуон бүддьүөтүттэн быйыл көрүллүбүт биир мөлүйүөн солкуобайга саҥа хотон бырайыага, сылгы базатын өрөмүөнэ оҥоһулла сылдьар. Отделение салайааччыта Кирилл Алексеев кэпсииринэн, атырдьах ыйын 1 күнүгэр тэрилтэ 60 туонна оттоммут. Барыта 150-180 туонна от бэлэмнэниэхтээх. 2020 сыл инвестиционнай бырагырааматынан 200 миэстэлээх сүөһү турар комплекса тутуллан саҕаламмыт. Тутууну «Агрохолдинг Туймаада» АО ыытар.
Инникитин Сүлдьүкээрдээҕи саха ынаҕын иитэр салаа оҥорон таһаарар сыахтаах тэрилтэ буолуо.
Сиһилии манна аах https://ysia.ru/v-mirninskom-rajone-nachali-stroit-zhivotnovodcheskij-kompleks-dlya-sohraneniya-yakutskoj-porody-korov/
