ХИФУ медицинскэй институтун аспирана, медицинэ национальнай киинин хирург-уролога Руслан Винокуров өлбүт киһиттэн бүөрү тыыннаах киһиэхэ Саха сиригэр аан бастаан олордууга көмөлөспүтэ. Биллэрин курдук, өрөспүүбүлүкэ историятыгар урут хаһан да суох түгэн от ыйын 22 буолбута. 10-тан тахса сыл икки бүөрэ ыараханнык ыалдьар эдэр дьахтарга донор бүөрүн олортулар.
«2000 сыллартан ыла киһиэхэ уруулуу уорганы олордуу саҕаламмыта. Букатын атын киһиттэн олордуу аан дойдуга оҥоһуллубута быданнаата. Оттон Саха сиригэр саҥа уопут буолла. Маныаха диэри өрөспүүбүлүкэҕэ ону ким да оҥоро илик этэ», – диэн хирург Руслан Винокуров кэпсиир.
Саха сирин кылаабынай транплантолога Альберт Васильев салайааччылаах анестизиологтар, хирургтар икки биригээдэлэрэ 12-тэн тахса чаас устата эпирээссийэ оҥорбуттара. «Ыарахан ыарыыттан олоҕо быстар ыарахан ыарыһаҕы ымпыгар-чымпыгар тиийэ анализ кэнниттэн быһаараллар. Кинилэр бүөргэ донор буолар кыахтаахтар. Ол кэнниттэн ыарыһахтар хааннарын бэрэбиэркэлииллэр. Манна иммунологическай типирование, Cross-Match тест оҥоһуллар. Медицинэ национальнай киинигэр бүөргэ наадыйааччылар испииһэктэрэ баар. Өскөтүн ыарыһах киһи уонна донор хааннара сөп түбэстэхтэринэ, хааны булкуйан бэрэбиэркэ оҥоһуллар. Манна сөп түбэһии баара билиннэҕинэ, эпирээссийэ ананар. Өлбүт киһи бүөрүн хостоон ылан атыҥҥа олордоллор», – диэн кини быһаарда.
Руслан Винокуров ити буолан ааспыт эпирээссийэ Саха сирин медицинэтигэр уонна трансплантологиятыгар балысхан ситиһии буоларын, дьону быыһыырга маннык эпирээссийэлэр салгыы ыытыллыахтаахтарын чиҥэтэн этэр. «Бүөрү эрэ буолбакка, атын уорганнары: быары, сүрэҕи, бэл оһоҕоһу атын киһиэхэ олордуохха сөп», –диир хирург-уролог.
Доруобуйа харыстабылын министиэристибэтигэр эппиттэринэн, маннык эпирээссийэҕэ бэлэмниир туһугар 1-кы уонна 2-с нүөмэрдээх өрөспүүбүлүкэтээҕи балыыһалар үлэлэрин дьүөрэлиир үлэ ыам ыйыгар ыытыллыбыт. Тэрилтэлэр саҥа оборудованиены атыыласпыттар, аныгы ирдэбилгэ эппиэттэһэр дьаһаллары олоххо киллэрбиттэр.
