Ааспыт нэдиэлэҕэ, ол эбэтэр атырдьах ыйын 27 кунугэр «Розовай чаайка» экологическэй кулууп оҕолоро, Оҕо эбии үөрэхтээһинин киинин дириэктэрэ Наталья Болхоеваулуустааҕы айылҕа харыстабылын инспекциятын салайааччыта Лена Арьянова буолан «Анаабыр Алмаастара» АО «Эбэлээх-Гусиный» учаастагар, норуокка биллэринэн «Пентагонна» бара сырыттыбыт.
Бу сырыы «Анаабыр Алмаастара» АО уонна «Розовай чайка» экологическэй кулууп икки ардынааҕы үлэлэһии бырагырааматын чэрчитинэн тэрилиннэ. Сурун сыала-соруга — дойдубутугар кус-хаас уйаланан, төрөөн-ууһаан үөскүрүгэр усулуобуйа оҥоруу. Бу чэрчитинэн «Розовая чайка» экологическэй кулууп оҕолоро бэйэлэрэ оҥорбут искусственнай уйаларын рекультивацияламмыт алмаас учаастактарын күөллэригэр, өрустэригэр илдьэн туруораллар, итиэннэ алмаас хостуур тэрилтэ үлэтин көрдөрөр-билиһиннэрэр профориентационнай хайысхалаах экскурсиялааһыны тэрийии буолар. Маннык хамсааһын бу саас муус устар ыйыгар эмиэ ыытыллыбыта.
Ити курдук, үс аҥаар чаас кэринэ айаннаан Эбэлээххэ тиийдибит. Биэрэккэ вахтовка көрүстэ, сэрэхтээх буолууга инструктаж аастыбыт. Биһигини «Анаабыр Алмаастара» ОА экологияҕа салаатын начальнигын солбуйааччыта Гурьев Василий көрүстэ уонна күн устата салайан илдьэ сырытта. Бастаан биэрэктэн 10-ча км. тэйиччи баар «Куман-нижний» диэн суортуур учаастакка илтилэр. Онно тиийээппитин кытта комплекс начальнига Егоров Терентий уонна «Эбэлээх-Гусиный» учаастагын начальнига Игнатьев Андрей комплекс үлэтин, алмааһы хайдах сиртэн хостоон таһааран, сууйан, ыраастаан бэлэмнииллэрин оҕолорго сиһилии көрдөрөн кэпсээтилэр. Ол кэннэ полигонна илдьэн улахан тиэхиньикэлэр үлэлэрин көрдөрдүлэр. Онно Италияҕа оҥоһуллубут «PERLINI» карьернай самосваллары, погрузчиктары көрөннөр оҕолор олус сөхтүлэр. Аарыма улахан тиэхиньикэлэр тастарыгар турдахпытына, нэһиилэ көлүөһэтин аҥаарыгар эрэ дылы тиийэр эбиппит.
«Исток» учаастакка тэлэһийэ сытар аата-суола суох икки кыра күөлгэ уон уйаттан биэһин илдьэн туруордулар, иһигэр эбии от хаалаан сымнаттылар итиэннэ алмаас үлэһиттэрэ бэлэмнээбит «Зона покоя» диэн табличкаларынан бэлиэтээтилэр. Уйаларга суруллубут Свешников Мичил, Рудых Саша, Жаркова Ванесса, Дьяконов Миша, Болхоева Наталья ааттарын GPS-оборудованиеҕа киллэрэн бэлиэтэннилэр. Эһиил саас ким оҥорбут уйатыгар кус-хаас уйаламмытын онон билиэхтэрэ.
Онус сылын «Анаабыр Алмаастара» ОА экологияҕа салаатын начальнигын солбуйааччытынан улэлиир Гурьев Василий санаатын бу курдук үллэһиннэ:
— Биһиги «Розовая чайка» экологическай кулуубу кытта 2012 сыллаахтан бииргэ үлэлэһэбит. Бу иннинэ көннөрү өйөөһүн, билсиһии курдук эбит буоллаҕына, 2012 сылтан саҕалаан тэрилтэ иһигэр бүддьүөккэ киллэрэн, үп-харчы көрөн инвентарынан, ол иһигэр иһитинэн-хомуоһунан, палатканан, тутуу матырыйаалынан уо.д.а. хааччыйан Уудьаҕа лааҕыр тэриллибитэ. Онтон ыла сылтан сыл аайы лааҕыр үлэтин салҕыыр. Наталья Николаевна курдук энтузиаст киһи баар буолан үлэлии турар. Кинини солбуйар киһи баара буоллар, лааҕыр үлэтэ салгыы сайдан иһиэх этэ. Этэн аһарбытым курдук, бастакы өйөөһүнү ол саҕаттан билиннээҥҥэ дылы үлэлээбит генеральнай директорбыт Матвей Евсеев уонна бастакы солбуйааччы Иван Андреев оҥорбуттара, биһиги этии киллэрбиппитигэр тута өйөөбүттэрэ. Тэрээһин сурун сыала-соруга экологияҕа эрэ сыһыаннаах буолбатах. Манна үлэлиир идэлэргэ профориентационнай үлэни эмиэ ыытар. Ол курдук, манна электриктар, бульдозеристар, горняктар, маркшейдердар бааллар. Бу олохтоох нэһилиэнньэ ыччата промышленнай үлэҕэ сыһыннын диэммит тэрийбиппит. Көрө сылдьан үлэҕэ сыстан үүнэн тахсыахтара буоллаҕа.
Алмаас учаастагар оҕолору аҕалан экскурсиялатыы үһүс сылын ыытыллар. Сыл аайы сайыҥҥы еттугэр оҕолору аҕаламмыт билиһиннэрэбит. Кыһын араас таһымнаах күрэхтэһиилэри ыытабыт. Былырыын айылҕаҕа сыһыаннаах фото-куонкурус тэрийбиппит. Онно лааҕыр оҕолоро эрэ буолбакка, улуус бары оҕото кыттыбыта. Үлэлэһэр хайысхабыт элбэх. Начальникпыт Сидор Алексеевич искусственнай уйа туруоруутугар оҕолору сыһыаран, кыттыһыннаран үлэлэтиэххэ диэн быһаарбыта. Бу саас «Биллээх» уонна «Тулаа» урэхтэргэ уопсайа 12 устуука уйаны туруорбуппут. Оҕолор сатаабаттарыттан мөлтөх соҕус оҥоһуулаах буолан, тыалга алдьаммыттар этэ. Биэс уйа хаачыстыбаннай этэ, билигин олор ордон тураллар. Биир кус оҕоломмут, уйаламмыт. Билигин ордубут биэс уйалары өрүстэри кэрийэммин уурталыаҕым уонна уйаламмыт куһу баран көрүөҕум. Инники өттүгэр саҥа салалтабыт бу үлэни салгыаҕа диэн эрэллээхпит.
Кэлэрбит саҕана оҕолорго сюрприз кэтэһэр диэн эрдэттэн биллэрбиттэрэ. Алмаас үлэһиттэрэ минньигэс тортаах остуол бэлэмнээбиттэр эбит. Ону таһынан фрукта, кэмпиэт кэһии туттарбыттара. Онон оҕолор астынан, дьиэлэригэр төннөллөрүгэр үөрүүлэрэ үгус. Ити курдук, олус интэриэһинэй ис хоһоонноох сырыы буолла. Тугэнинэн туһанан, «Розовай чайка» экологическай кулууп иитииллээччилэрэ, салайааччы Наталһя Болхоева «Анаабыр Алмаастара» АО коллективыгар уонна Гурьев Василийга махталларын тиэрдэллэр.
