Ростелеком «Домашний интернет» тарыыпка лимиитэ суох интернети Үөһээ Бүлүү улууһун Хоро, Липпэ-Атах, Сайылык, Далыр, Харбаала, Боотулуу, Баҕадьа уонна Дүллүкү сэлиэнньэлэригэр киллэрдэ. Интернет түргэнэ — 5 Мбит/с.
Эрдэ олохтоохтор спутник ханаалынан сибээстэригэр туһаналлара. Интернети түргэтэтэр уонна лимиитэ суох тарыыбы киллэрэр туһугар Ростелеком аҕыс нэһилиэнньэлээх пууҥҥа диэри ВОЛС тардыбыта. Магистраль уһуна — 185 км. Ыытар кыаҕа – 10 Гбит/с, өссө кэҥиэн сөп. Тутуу 2019 — 2020 сылларга улуус дьаһалтатын кытта судаарыстыбаннай-чааһынай бииргэ үлэлээһин бырагырааманан ыытыллыбыта.
«Ростелекома маннык үлэҕэ улахан уопуттаах. Хас биирдии бырайыак цифровой экономиканы сайыннарыыга тирэх буолар. Кэлэр сылга салгыы үлэлиэхпит — Кырыкый, Куду, Быракаан уонна Өргүөт нэһилиэктэригэр тиийиэхпит», — диэтэ Прокопий Неустроев, Ростелеком Саха сиринээҕи филиалын судаарыстыбаннай уонна корпоративнай сегменнары кытта үлэҕэ дириэктэр.
