Россия Паралимпийскай кэмитиэтэ Лозаннаҕа спорт арбитражнай суутугар дойду атлеттарын Рио Оонньууларыгар киллэрэр туһунан апелляция сайабылыанньатын атырдьах ыйын 15 күнүгэр киллэрбитэ. Мунньах атырдьах ыйын 21 күнүгэр буолуоҕа. Ити туһунан биэдэмистибэ пресс-сулууспата иһитиннэрэр.
Атырдьах ыйын 7 күнүгэр норуоттар икки ардыларынааҕы паралимпийскай кэмитиэт Россия сүүмэрдэммит хамаандатын Паралимпиадаҕа киллэрбэт туһунан биир киһи курдук куоластаабыта. Дойду хамаандатыгар 270 спортсмен баар, кинилэр ортолоругар түөрт саха — Владимир Балынец, Анастасия Диодорова, Степанида Артахинова уонна Алена Дмитриева.
«Мунньах Бразилияҕа атырдьах ыйын 21 күнүгэр буолар, оттон спорт арбитражнай суутун быһаарыыта күн хойутаан биллэриллэр», — диэн исполком бэрэссэдээтэлэ, РПК бастакы вице-президенэ Павел Рожков эттэ.
XV-с Паралимпийскай оонньуулар балаҕан ыйын 7-18 күннэригэр Рио-де-Жанейроҕа ыытылаллар. Манна 176 дойдуттан 4 тыһыынчаттан тахса спортсмен кыттар, спорт 22 көрүҥэр мэтээл 528 кэмпилиэгэ оонньонор.
