РФ Үлэҕэ министиэристибэтэ 2018 сылга өрөбүл уонна бырааһынньык түбэһэр күннэрин көһөрөр туһунан бырабыыталыстыба уурааҕын бырайыагын бэлэмнээтэ. Россия олохтоохторо 2017 сыл ахсынньы 30 күнүттэн 2018 сыл тохсунньу 8 күнүгэр диэри, олунньу 23-тэн 25-гэр, кулун тутар 8-тан 11-гэр, муус устар 29-тан ыам ыйын 2-гэр, ыам ыйын 9 күнүгэр, бэс ыйын 10-тан 12-гэр диэри уонна сэтинньи 3-тэн 5-гэр диэри сынньаныахтара. Бу сынньалаҥ күннэрин холбоотоххо, дойдуга 2018 сылга 28 күн өрөбүлүнэн буолар.
Быһаарыы быһыытынан, бу сынньалаҥнар «үлэһиттэр өрөбүллэрин уонна бырааһынньык түбэһэр күннэрин туһалаахтык атааралларыгар ананар». Тохсунньу 6 уонна 7 күннэригэр субуота уонна өрөбүл түбэһэринэн, ити күннэри кулун тутар 9-гар бээтинсэҕэ уонна ыам ыйын 2-гэр сэрэдэҕэ сыҕарыттылар. Маны сэргэ, субуотаҕа түбэһитэлиир муус устар 28-н, бэс ыйын 9-н уонна ахсынньы 29 күнүн туһааннааҕынан муус устар 30-гар, бэс ыйын 11-гэр уонна ахсынньы 31-гэр көһөрөргө былааннанна.
2016 сыл алтынньытыгар бырабыыталыстыба от ыйын 8 күнүгэр Россияҕа бэлиэтэнэр Дьиэ кэргэн, таптал уонна эрэллээх буолуу күнүн өрөбүл күнүнэн ааҕартан туттуммута. Салайааччылар бу миэрэни аһара барыы быһыытынан аахпыттара. Ити эрээри миниистирдэр кабинеттара бу бырааһынньык суолтатын тарҕатыыны көҕүлүүр. Сокуон бырайыагын ааптардара бу күнү бэлиэтээһин национальнай таһымҥа оҕо төрөөһүнүн уонна сиэрдээх буолууну үөскэтэрин бигэргэтэллэр.
