Ленин болуоссатыгар тыһыынчанан устудьуон мустан сайыҥҥы үлэ сезонун арыйыы сиэригэр-туомугар кытынна. Эдэр ыччат биир бастыҥ тэрээһинин саҕаланыытын Ил Дархан Егор Борисов арыйда.
«Саха сиригэр Ыччат сылыгар анаммыт устудьуоннар сайыҥҥы үлэлэрин сезонун арыллыбытынан ааҕарбар көҥүллээҥ!» — диэтэ Егор Борисов. Ити иннинэ киниэхэ регионнааҕы тустаах тэрилтэ салайааччыта Николай Тарасов устудьуоннар үлэҕэ бэлэмнэрин туһунан рапорт биэрдэ.
Өрөгөйдөөх тэрээһиҥҥэ Россиятааҕы устудьуоннар этэрээттэрин аппаратын салайааччытын солбуйааччы Алина Саввина кытынна: «Эһигини өссө биир сайыҥҥы үлэ саҕаламмытынын эҕэрдэлиибин. Россия үрдүнэн эһигини кытта тэҥҥэ 74 региоҥҥа барыта 200 тыһыынча байыас үлэҕэ турунна. Сайын диэн толкуйдаабыты тобулар, ситэрэр, саҥа доҕоттордонор уонна бэйэ кыаҕын муҥутуур күүһүн туһанар кэм«.
Болуоссат үрдүнэн өрөспүүбүлүкэтээҕи устудьуоннар этэрээттэрин былааҕын «Харысхал» этэрээт комиссара Виктор Климовскай, «Роза ветров» этэрээт мелодиһа Афанасия Антоева, ДьТХА этэрээтин салайааччыта Владимир Малкин күөрэттилэр.
Маны сэргэ үөрүүлээх түһүлгэҕэ Бүтүн Россиятааҕы устудьуоннар сүлүөттэрин былааҕа киллэрилиннэ. Киэҥ ыҥырыылаах тэрээһин алтынньыга буолара былааннанар.
